Наргиз Гюлечова
Улихьна йигъари Казбеков райондиз командировкайиз гъушунза. Хасавюрт райондин аьтрафарилан Казбеков райондин аьтрафариинди улучIвубси, улихь рябкъруб вари Салатавия терефнан йифу ккаънайи ягъал дагълар вуйи. Хъа учв район кIуруш, Табасаран районси гьебгъунзуз, фицики улихь рябкъру йишвар вари яркврар вуйи. Хъа гьамусяаьт кьюрд вуйивалиан гьарар гъяцIалди а кIури, хьадан вахтари душваъра, ухьухьси, гизаф чрушин айибдиин умудлу вуза.
Дагъустандин кафари терефнаъ айи райондиз гъягъбан себеб дагълариз лигуб дайиз, хъа хайлин йисари шид адарди яшамиш шулайи гъулариз «Хулар ва шагьрин аьтрафар» милли проектдин дахилнаъ айи «Марцци шид» федералин проектдиинди шид зигбакан бикIуб вуйиз. Гьяйифки, рякъя-риин миркк улубзнайивализ лигну, шид уч шулайи Эшеха кIуру йишвахьна учхьан, журналистарихьан, ккудучIвуз гъабхьундарчухьан. Хъа республикайин саки вари министрарра хъади, райондиз дуфнайи Дагъустандин Правительствойин председатель Аьбдулмуслим Аьбдулмуслимов йишв’ина душну, душваъ духнайи вари ляхнарихъди таниш гъахьну.
Казбеков райондиз шид зигбан тарих гьамциб гъабхьну: 2022-пи йисан Дагъустандин Главайин прямой эфир айи вахтна, райондин агьалйир учIруди дийигънайи месэла гьял апIбаъ кюмек ккун апIури, Сергей Меликовдихьна илтIикIнийи. Республикайин кIулиъ айирин табшуругъ тамам апIури, жавабдар органари дишлади проектдинна сметайин документация гьязур дапIну, Ишхойлам кIуру йишвахь Акташ нир’ан Алмак, Буртунай, Дылым, Гуни, Гостала, Инчха гъуларизди шид гъюру турбйир ккирчну, гьаму гъуларин агьалйир штухъди тямин гъапIну.
Райондин агьалйирин гафариинди, дурар 1944-пи йихъанмина штуз ккилигурайидар ву. Улихь вахтари шид гъюри гъабхьну, аммаки 4 йигъак сабан. Гьаму муддатнан арайиъ резервуарар штухъди ацIуйи.
Райондин агьалйир убхъру марцци штухъди тямин апIбахъди аьлакьалу вуди багъри райондиз дуфнайи Аьбдулмуслим Аьбдулмуслимов хусуси метлеб айи дявдин операцияйиъ баяр, жилар иштирак шулайи хизанарихъдира, гьадму операцияйиъ чан жан туву балин кюлфетдихъдира гюрюшмиш гъахьну. Гьацира райондин яшайишдин объектаризра лигуз гъушну.
Къайд апIуб лазим вуки, гъийин йигъан, Ватандин маракьар уьрхюри хусуси метлеб айи дявдин операцияйиъ Казбеков райондианра саки 2 агъзуркьан агьалйир иштирак шула. Гъийихдарин кьадарра цIиб дар.
Зиихъ ктуху месэлйириз лигбан кьяляхъ, Аьбдулмуслим Аьбдулмуслимов Дылым гъулан культурайин хулаъ райондин агьалйирихъди гюрюшмиш гъахьну.
Дугъу райондин экономикайин артмиш’валариз бахш дапIнайи доклад гъурхну. Хъасин улхуб давам апIури, райондин агьалйирихьна илтIикIну, гъулан мяишатдиз артухъ фикир тувуб, думу артмиш апIуб тIалаб гъапIнийи.
«Узу гъи йиз багъри райондиз дуфназа. Мушваъ айи вари читин месэлйирихъди танишра вуза. Вушра учвканра аьхю тIалаб вуйиз, айи месэлйирин гьякьнаан гъулаъ мясляаьт дапIну, республикайин улихь-кIулихь хьайидар думу месэлйириз лигбан бадали, сар-кьюр кас правительствойиз гьаай», – гъапнийи премьер-министри.
Сюгьбат давам апIури, Аьбдулмуслимовди Казбеков райондин жямяаьтлугъ уьмриъ айи жара учIру месэлйирра гъитIирккнийи. «Гьаз му йиз багъри райондиан вуйи выпускникар заан образование гъадабгъуз вузарик кучIври адар? Гьар йисан республикайин гьарсаб вуздик урхуз кучIвбан бадали, узу хайлиндариз кюмек апIураза, аммаки Казбеков райондиан сар каскьан илтIикIурадарзухьна», – наразивал ади гъапнийи Аьбдулмуслим Аьбдулмуслимовди.
Серенжемдиъ райондин дишагьлийирин советдин председатель Пата Айтемирова удучIвну гъулхнийи. Дугъан гафариинди, шид адарди хайлин йисари яшамиш шулайи касарихьан му йигъ машквран йигъси гьисаб апIузра шулу.
«Юкьуд йигъак сабан шид туври шлу вахтари инсанари шид уч апIури шуйча. Ккурттар урччбан кьяляхъ гъубзну айи шид сарира гатIабхьурдайи. Думу штухъди ликариин алахьрудар, гьяятар жикIури шуйча. Хъа сарун дицдар читин йигъар улдучIвну», – разивал кади гъапнийи Пата Айтемировайи.
Аьлава апIури дупну ккундуки, кьюд йисандин арайиъ, му гъуларин 33 агъзур агьали марцци штухъди тямин апIуз 50 километрин манзилнаъ турбйир ккирчну. Турбйириан 1 секунддин арайиъ 80 литр шид гъюра. Мидланра гъайри, гьаму проект юрутмиш апIури, 250-рилан 1200 кубометрин марцци шид уч шлу 12 резервуарра ва шид марцц апIру 6 станцияра дивна.
