Республикайин ва федералин мялуматарин дакьатариъ «Дагъустандин Огни шагьур» шагьрин округдиъ кючйириан тина чиркин шид гъябгъюрайивалин месэла гъитIибккнийи.
Гьаддихъди аьлакьалу вуди июлин 9-пи йигъан кьибла аьтрафарин округдиъ РД-йин Главайин вари ихтиярар тувнайи вакил Фуад Шихиев ва Дагъустандин Огни шагьрин округдин глава Зейдуллагь Гьяшимов месэла арайиз дуфнайи кючйириз гъушну. Му месэла гъи арайиз гъафиб дар, шагьриъ чиркин шид марцц апIру дараматар адар. Чиркин шид марцц апIбан бадали, 2008-пи йисан тикмиш апIуз хъюгъю дарамат гъира гьаци дипну гъубзна. РД-йиъ айи Роспотребнадзорин идарайи гьар йисан 1300 агъзур манатдин журум апIура, фицики шагьриъ чиркин шид марцц дарапIди гьюлиз гъябгъюра.
Шагьрин администрацияйи ЖКХ-йиъ реформйир гъахбан фонднан ва инвесторарин пулин кюмекниинди зиихъ гьитIибккнайи месэлайин саб пай гьял апIуз документар гьязур дапIна, амма фонднаъ пул адрувализ лигну, месэла гьял апIуз шуладар.
Дагъустандин Огни шагьриъ агьалйир штухъди тямин апIбан ва чиркин штун месэлйир РД-йин Гьюкуматдин кIулиъ айидарин улихьра кми-кмиди за апIури шулу.
2019-пи йисан июндин вазлиъ ЖКХ-йиъ реформйир гъахбан Фонднан кIулиъ айирихъди гъубшу гюрюшдиъ Гьяшимовди Дагъустандин Огни шагьриъ чиркин шид марцц апIру дарамат тикмиш апIуз пулин дакьатар жара апIбан гьякьнаан йикьрар гъийитIну.
