Гюльнара Мягьямедова

Февралин 14-пи йигъан Мягьячгъалайиъ Гъумугъарин театрин дараматдиъ Афгъанистандиан ихь советарин эскрар адаъну 35 йис тамам хьпаз бахш дапIнайи серенжем кIули гъубшну. Серенжем Дагъустандин Правительствойин председателин сарпи заместитель Рамазан Жяфаровди ачмиш гъапIнийи. Дугъу чан улхбаъ къайд гъапIганси, ихь эскрари ва офицерари Ватандин сяргьятарин хатIасузвал уьбхюри, Афгъанистандин халкьдиз экономикайин ва рягьимлувалин кюмек туври, чпин буржи намуслувалиинди тамам гъапIну.

Афгъандин дявдин женгариъ 3500-тIан зиина дагъустанлуйир иштирак гъахьну. Дурарикан 141 касди, ватанпервервалин буржи тамам апIури, чпин жанар тувну. Гьадрарикан Дербент райондин агьали Абас Исрафиловдиз ва ЦIунтIа райондин агьали Нухидин Гьяжиевдиз (йикIбан кьяляхъ) Советарин Союздин ва Урусатдин Игит ччвурар тувну.

Уч духьнайидарин улихь афгъандин гьядисйирин ветеранарин, инвалидарин, гъийихдарин хизанарин тешкилатарин Координационный советдин председатель Мягьямед Арипов удучIвну гъулхнийи. Дугъу афгъандин ветеранарин тешкилатди жигьиларин арайиъ гъабхурайи ватанпервервалин тербия тувбан ляхникан ктибтнийи.
Серенжемдин аьхириъ афгъанарин гьяракатнан иштиракчйириз гьюкуматдин наградйир тувнийи.