«Йиз багъри гъул» конкурс
Гурихъ гъул Гурхъарин гъулан советдин центр ву. Гурхъарин сельсоветдик Гурихъ, Ляха, Гисик, Кувагъ, Дагъни, Гюгьрягъ гъулар кахьра. Имбу гъуларси, Гурихъ гъулра дегьзаманайиъ дивнайиб ву. Сифте му гъулан ччвур Курих вуди гъабхьну. Гурихъ гъулаъ гъарзарик, тепйирик яшамиш шлу йишвар гъахьну.
Гъулан аьтрафариин БицIи Гурихъ, Хумак, Ярдак кIуру хутIлар, Кьаздихъ, Пирар кIуру йишвар ал. Кюгьне вахтари инсанар гизаф йихури гъахьну, гьаз гъапиш дурар гъарзаригъ, дараскьал шартIариъ яшамиш шули гъахьну. Яваш-явашди Курих гъул исина ктубчIвури, цIийи хулар тикмиш апIури, жюрбежюр тухмар айи саб аьхю гъул арайиз гъафну. Магьа думу тухмар: Арамкьар, Аж’яр, БаршвутI’яр, Гъяйч’яр, Кавх’яр, КIез’яр, ПIалтIар, Уз’яр, ЦIизар, ТIяряг’яр, Халф’яр, КIакIнугьар, Ших’яр ва ж.
Гурихъ гъулан агьалйирин асас ляхин игнар, гьяжибугъда убзувал гъабхьну. Гурихъ гъулан жигьилар думу вахтари хюрчаз гизаф чIурдин силариина, иллагьки гъюрариина, гъягъюйи. Фицики дурар мушваъ гизаф айи. Гурихъ гъулан саб айтура а: «Гурхъари гъюран кIул ургубан кипну гъубхьну». Гьаддиз йиз гъуландариз «гъюран кIуларра» дупна.
Жара гъуларизси, му гъулазра дявдин йисари читин йигъар алахьну.
1931-пи йисан Гурихъ гъулаъ ккергъбан мектеб, хъа 1933-пи йисан ургуд йисандин интернат-мектеб арццну. Директор Мирзагьясан Рашидов вуйи. Хъа 1982-пи йисан ургуд йисандин мектебдикан кьялан мектеб гъапIну.
Гурхъарин мектеб ккудубкIдарикан гизаф аьлимар, профессорар, илмарин кандидатар ва докторар гъахьну. Мисалназ, Юсуфоварин хизандиан 3 илмарин докторар ва 3 илмарин кандидатар удучIвну. Кьюр йиз эмра илмарин кандидатар ву: Закир Мирзаев юридический илмарин (думу гьамус Педуниверситетдиъ тарихи факультетдин декандин заместителди лихура), хъа Жабраил Мирзаев – биологияйин илмарин кандидат.
Улихьдин вахтари ич гъулан дишагьлийир халачйир гизаф урхури гъахьну. 1975-пи йисан йиз баб Мирзаева Герек Кьадировна ужуб ерийин ляхин апIбаз лигну, Зегьметнан аднан III дережайин ордендихъди лишанлу гъапIну.
Гьамусяаьт Гурихъ гъулаъ 804 инсан яшамиш шула. Гъул аьхю ва уткан дубхьна. Гьарсаб мягьялиз ччвурарра тувна: муганаз йирси гъул али йишваз Гурхъарин кюче, мектеб али кючейиз Школьная кIура, Горная, Садовая кючйирра а, хъа узу яшамиш шулайи цIийи мягьялин кючейиз Молодежная кIура. Ухдиси дарди гьамусдин инсанар шагьрариъ айидарихьан жара апIуз шули амдар. Варидарин хулариз шид, газ , акв ва интернет дизигна. Алабхьру палат, ипIру уьл – варидариз гьубкIну а. Гьич сар касдизра гаш’вал ва аьжузвал дярябкъри.
Узуз йиз гъул гизаф кьабулди ва ккунди вузуз.
