Ихь республикайин спортсменарин заан хъуркьуваларикан вари уьлкейиъ айидариз аьгъя. Вушра, шагьрариъна гъулариъ спортдихъ юкIв хъайи гьарсар касдин тIалабар гьуркIбан бадали тялукь шартIар яратмиш дапIну адрубра рябкъюрахьуз. Дагъустандин Огни шагьриъ яшамиш шулайи баяр-шубарин, агьалйирин спортдихьна вуйи маракьлуваликан, дурариз азад вахт гьапIбан бадали яратмиш дапIнайи шартIарикан узу шагьрин жигьиларин, спортдин ва туризмдин отделин кIулин пишекар А.Г.Подколодневдихъди сюгьбат гъубхунза.
Анатолий Григорьевичди къайд гъапIганси, шагьриъ бицIи яшнахъан хъюгъну баяр-шубарин спортдихьна вуйи иштагь артухъ апIури, вари 6 бицIидарин багъариъ физкультурайин инструкторар лихура. Гьацира, вари мектебариъ 19 физкультурайин мялимари, шагьриъ имбу 2 спортдин мектебдиъ (улихьнаси 4 айи) 18 тренери ляхин гъабхура.
«Дагъустандин Огни шагьрин баяр-шубар спортдиин гизаф юкIв алидар ву. Шагьриъ айи 2 спортдин мектебар, дурарин дараматар гизаф йирси духьнайивализ лигну, хъяркьну. Улихьнаси 1200 байна риш спортдин мектебариз гъюри гъахьнуш, гьамусяаьт дурарин кьадар кьюб ражари цIиб ву. Гьацира, ич шагьриъ Мягьямедсалам Умахановдин ччурнахъ хъайи боксдин филиал – мектебра а. Думу лазим вуйибдихъди Мягьячгъалайи тямин апIура. Хъа имбу спортдин мектебар, мектебарин спортзалар лазим вуйибдихъди тямин апIбан бадали шагьриз пулин дакьатар адар. Мисалназ, 6-пи нумрайин мектебдиъ спортзал адар, 2-пи, 8-пи нумрайин мектебариъ спортзаларин ерина физкультурайин дарсар бицIи классарстар йишвариъ кивра. Дагъ.Огнийин стадионра рас дапIну ккунду.
Гьамусяаьт авгъуст вазлин 10-пи йигъан къайд апIурайи физкультурникдин Йигъаз гьязур шулача. Думу йигъан футболиан, пляждин волейболиан талитар тешкил апIуз ккача», – ктибтнийи йиз сюгьбатчийи.
А.Подколодневдин гафариинди, пулин дакьатар гьуркIну адрувалиан баяр-шубариз жара йишвариъ гъягъру жюрбежюр талитариъ иштирак хьуб читинди алабхъура. Вушра, аьхиримжи вахтна «Гъидкьин туп» кIуру футболин турнир, шахматаринна шашкйирин, гьар вазли боксдин турнирар, армспортдин талитар, Астрахань шагьриан вуйи боксёрарихъди талитар тешкил гъапIну.
«Гьамусяаьт тяйин дапIнайи социалин нормйириинди Дагъустандин Огни шагьриъ яшамиш шулайи, спортдиин машгъул вуйи 30% агьалйиризтIан спортдин тешкилатар гьуркIрадар. ВаритIан читин вуйи, гьял дапIну ккуни месэла – шагьрин стадион къайдайиз хуб ву. 2012-пи йисан «РД-йин 2011–2015-пи йисариз вуйи физкультурайинна спортдин артмиш`вал» кIуру республикайин программайиинди стадиондиз искусственный газон тувуб планламиш дапIнайи. Му месэла гьял гъапIундар. Шагьрин 2-пи нумрайин спортдин мектебдин спортзалиъ ужудар шартIар яратмиш дапIна. Му мектебдин тренер Вадим Мягьямедовди шагьриъ спорт артмиш хьпаз гизаф фикир тувра, ва республикайин талитарра мушваъ заан дережайиинди кIули гъягъюра», – давам апIура Анатолий Григорьевичди.
– Шагьриъ гьацира футболизра, волейболизра фикир тувра. Аьхиримжи вахтна спортдин ММА-йин жюрйирин кчIихбариин гизафдар машгъул духьна. Гьацира, хябяхъдин вахтна спортзалариъ аьхю яш айи, спортдихъ юкIв хъайидар уч шула.
Шагьриъ гъягъру талитариъ шагьрин Собраниейин депутатарира иштираквал апIура, шагьрин администрацияйи удукьру кюмек тувра. Гьар вахтна шагьрин агьалйир сагъу уьмрин терефкрар хьпан бадали жигьиларин, спортдин ва туризмдин отдели ГУО-йихъди сабхилди шагьрин газатдиъ, «Огни» ТВ-йиъ профилактикайин ляхин кIули гъабхура.
Йиз сюгьбатчийи, чпин шагьур иштирак шулайи «Моногород» кIуру президентдин программа уьмриз кечирмиш апIру вахтна спортдизра фикир тувур кIури, умуд кивра.
