Мюгьтал хьуз ляхин адар, жямяаьтлугъди вари вахтари жигьилар айи аьгьвалатнакан, дурарин гьялнакан фикир апIури гъахьну, гьаз гъапиш жигьилар фунуб уьлкейинра гележегдин тикилишчйир, дидин «закур» ву.
Культурайин заан дережайихъна дуфнайи гьарсаб гьюкуматдин агьалйири, ккунш дегьзаманайин Египетдиъ, ккунш гьамусдин Урусатдиъ, гьар вахтна гьисаб апIури гъахьну: уьлкейин кьисмат жигьиларикан, дурариз туву тербияйикан асиллу ву. Жигьилар фукьан ужуди уьмрихьна вердиш гъапIиш, дурар рюгь ва эдеб жигьатнаан фукьан артмишди гъахьиш, уьлкейин гележег гьадмукьан акуб ва бахтлуб хьибди. Думу ляхин гьюкуматдин политикайиканра, гьарсар ватандашдиканра асиллу ву, иллагьки думу жигьил кас вуди гъахьиш, зегьметкеш гъахьиш.
Жигьилвал – му вари ме-сэлйир зат дидригъди гьял дапIну, чпин кIваъ айи хиялар кIулиз удучIвувал ккун шлу вахт ву. Ва гьадму вахтна хилар хъержвну ляхин дапIну ккунду. Жигьилар гъавриъ духьну ккунду: дурарин фикрарикан саспидар лап читиндар, кIулиз удудучIврудар хьуз мумкин ву, амма саб якьин ву – дурари уьлкейиъ ужувлахъинди вуйи дигиш’валар апIуз улихь-кIулихь хьайидариз кюмек тувди.
Яшлуйирикан аьхиримжи вахтари, гьамусдин жигьилар чпиз ккуниб апIрудар, лап темпелдар, я чпикан, я халкьдикан фикир ктрудар ву кIури, гафар ерхьуру. Думу дици дар. Улихьдин вахтарихъан мина жигьилар жямяаьтдин лап зигьимлу пай вуди гъахьну.
Ватандин Аьхю дявдин ветеранарихъди сюгьбатар апIруган, дяви ккебгъу вахтна дурарин яшар 18-20 йис вуйивал аьгъю шулу. Дурариз дявдиъра, далу терефнаъра лап читинди алабхъну. Думу вахтна вари миж жигьиларик, жандин сагъу, кIубан баярик, аьхълушнахьан гудручIрударик кади гъабхьну.
Ихь уьлкейин гьюкум йигин, гьевеслу жигьилариз политикайин ляхин гъабхбаъ кюмек тувуз гьар вахтна чалишмиш шула. Урусатдин субъектариъ жигьиларин парламентар арццра, душвариъ гележегдин политикар ва уьлкейин руководителар гьязур апIура. Гъи баяр-шубариз мектебдин партайихъ хъмиди мектебдин парламент, самоуправление фтиз кIуруш аьгъю дубхьна, ва дурариъ лап аьхю иштирак’вал апIура.
Табасаран райондиъ «Муниципалин жигьиларин центр» 2015-пи йисан тешкил гъапIну, дидин директорди Рамис Сабирович Рамазанов лихура. Думу центрин асас вазифа – гьюкуматдин жигьиларин политика уьмриз юрутмиш апIувал ву.
Центриъ, Р. Рамазановдин гафариинди, жигьиларин жюрбежюр тешкилатар ляхник кирчна: ТОКС, Юнармия, волонтерарин десте, МГЕР («Сабвуйи Урусат» партияйин Жигьиларин гвардия).
«Гьар йисан 100-тIан артухъ жюрбежюр серенжемар тешкил апIурача: эдеблувалинна ватанпервервалин, экологияйин, фагьум артмиш апIбан, спортдин ва жарадар. Гьацира гьар йисан Табасаран райондиъ жигьиларин аьхю форумар, акцйир, флешмобар, конкурсар кIули гъахурача. Жигьиларин центриъ гьар жюрейин гьюжатар, бягьсар гъахру клубар а. Жямяаьтлугъ проектар дюзмиш апIбаан жигьилариз кюмек тувру мастер-классар гъахурача. Центриъ жигьилариз инглис чIал дубгъуз пулсуз курсар арццну, сад йистIан артухъ дубхьна», – ктибтнийи йиз сюгьбатчийи.
Дугъу Табасаран райондин глава Мягьямед Курбановдиз, гьарган жигьиларин жягьтлуваларин тереф уьбхюрайивализ, жигьилариз аьхю фикир туврайивализ лигну, чухсагъул мялум гъапIнийи. Главайи туврайи кюмекназ лигну, Табасаран район жигьиларин политика кIули гъабхбан жигьатнан Дагъустан Республикайин улихь хьайидарин жергйириъ а.
Вари уьлкейиъси, Табасаран райондиъра жигьилариз рягьятди дар. Урусат артмиш’валин цIийи дережайиз адапIбан жавабдарвалин гъагъ, гьял дарапIу месэлйир гьял апIувал жигьиларин гъюнариин алабхъура. Ухьу дидихьна гьязур духьну ккунду, гьаз гъапиш ухьуз варидиз кьувватлу, девлетлу, чан тарих ва жара уьлкйирин терефнаан гьюрмат айи, садакьайиз хил гьачIабккнадру, аьксина вуди, игьтияж айидариз чав кюмек тувру уьлкейиъ яшамиш хьуз ккундухьуз.
