Августдин 18-пи йигъан Дербент шагьри айи Петр Сарпирин Хулаъ ихь шаир Шюшеханум Керимовайин цIиб улихьнаси чапдиан удубчIву, бицIидариз вуйи «Бахтлу бицIи вахт» кIуру китабдин презентация гъабхьну. Му мяракайиъ Дербент шагьриъ яшамиш шулайи шаирар, табасаран чIалнан мялимар, Дагъ. Огни шагьрин музейин пишекрар, шаирин поэзияйихъди таниш вуйидар, Табасаран райондиан ва Дербент шагьриан вуйи баяр-шубар иштирак гъахьну.
Мярака абццур ихь шаир, «Гьевес» кIуру литературайин клубдин руководитель Эльмира Аьшурбегова вуйи. Дугъу чан удучIвну улхбаъ гьамци гъапний: «Мициб серенжемдиъ иштирак хьувалиин гизаф шад вуза. Вари инсанар жилиина сабси гъюру, сабси душвлан гъягъюру, хъа гьарсари жилиин чан хусуси шил гъибтуру. Ихь Шюшеханум Керимова гьадрарикан сар ву. 35 йисан Белгородский областдиъ дуланмиш гъахьнушра, ихь шаир табасаран чIалнахьан ярхла гъахьундар. Дугъан яратмиш апIбар ухдихъан мина ихь чIалниинди чапдиан удучIвурайи газатариъ, журналариъ, альманахариъ, шиърарин сатIиди вуйи гъварчариъ чап апIура. Дупну ккундуки, Шюшеханум Керимовайи литературайин артмиш’валилан савайи, Табасаран халкьдин уьмуми культурайин артмиш’валикра лайикьлу пай кивра. Дугъан хайлин шиърариан музыкайин деятелари мяълийир дидикIна».
Дагъустандин образованиейин лайкьлу пишекар ФатIимат Аьлиева-Мирзаевайи, шаирин яратмиш апIбариз кьимат туври, Шюшеханум Керимовайин поэзияйиз «арсран аьсриъ» яратмиш апIури гъахьи шаирарин поэзияйз ухшар айиваликан гъапнийи.
Дагъустандин Огни шагьрин музейин директордин заместитель Чибназ Залабеговнайи чан улхбаъ гьамци гъапний: «Бахтлу бицIи вахт» кIуру китабдихъди таниш гъахьунза. Узуз табасаран чIалниинди урхуз аьгъдаршра, гьаму китабдиъ чап дапIнайи шиърарин мяна аьгъю гъапIунза. Шаири думу шиърариъ халкьдихьна, ватандихьна вуйи чан ккунивал улупура. Гьацира дугъу жигьил наслиз, багъри веледариз гьарган дюз рякъюъди гъягъюз дих апIура.
Гъи ухьу вари интеллигенция: мялимар, шаирар, писателар, журналистар ва имбудар фици уч духьну, гъийин йигъ’ин рази вуш, гъит, ихь шаир Шюшеханум Керимовайин юкIвра гьарган разиди ибшри, думу чан метлебарихъ хъуркьри.
Китабдин художник Мягьямед Байрамовди чан улхбаъ къайд гъапIну: «Китаб аьхю аьшкьниинди гъурхунза. Пуз ккундузузки, гьамцдар марцци инсанар йиз багъри ругариин хьувалиинди узу дамагълу вуза. Китабдихъди таниш гъахьидарин аьху пайну, китабдин зиин вичун гьарин шикил гьаз гъизигнуш, суал тувниз. Гьаз гъапиш, Вичрикк гъул – вичарин гъул кIури, гьациб нугъат аийб ву. Хъа чав ихь шаир Шюшеханум Керимова Вичрикк гъулаъ бабкан гъахьир ву.
Азербайжан шаир Зейнаб Дербендли шаирин чав азербайжан чIалназ илтIибкIнайи «Дербент» кIуру шиъриан мяъли гъапIнийи, гьацира ихь ашукь Хидир Хаирбеговдира хайлин мяълийир гъапIний. Серенжемдиъ иштирак гъахьи имбу хяларира чпин улхбариъ Шюшеханум Керимовайин поэзияйикан хайлин ужудар гафар гъапнийи. Серенжемдин аьхириъ Шюшеханум Керимовай му шадлугънан мяракайиъ иштирак гъахьудариз варидариз аьху чухсагъул мялум гъапну.
