Гъябгъюрайи йисан 27-пи августдиъ Хив райондиъ цIийи дигиш`валар гъахьну. Райондин администрацияйин образованиейин отделин кIулиъ айи Казбек Зейнудинович Къазиев чан хушниинди ляхниан удучIвну. Думу гъуллугъниин Назаряли Асланович Тарланов дерккну.
Гьелбетда, Казбек Къазиев учв фуну гъуллугънаъ дерккишра, гъуллугънан вазифйир баркаллувалиинди кIулиз адагъурайивализ лигну, райондин администрацияйи думу культурайин, спортдин, жигьиларин политикайин ва туризмдин отделин начальникди дерккуз къарар адабгъну. Хъа муганайиз думу гъуллугънаъ айи Зарема Таригъулиевна Шагьсинова дугъан сарпи заместителди дерккну. Дурарин уьмрикан, гъапIу ляхнарикан, ягъурлувалин рякъкан ва хъуркьуваларикан улхури, гъарашугъарин арайиъ мярака абццур Хив райондин администрацияйин кIулиъ айирин сарпи заместитель Агъамирзе Гьямзабегов вуйи.
Дугъу чан улхбаъ къайд гъапIганси, Казбек Къазиев 1979-пи йисан 16-пи августдиъ Хив райондин Фурдагъ гъулаъ ашукьрин хизандиъ бабкан гъахьну. Багъри гъулан мектебдиъ 1-4-пи классариъ урхбалан кьяляхъ, 5-9-пи классариъ урхуз думу багахь ерлешмиш дубхьнайи Ургъа гъулаз гъягъюру. 1994-1996-пи йисари дугъу урхуб Мягьячгъалайиъ многопрофильный лицейиъ давам апIуру. 1996-пи йисан думу ДГПУ-йик урхуз кучIвру. Хъасин урхуб заочно жюрйиз илтIибкIну, 1999-пи йисан думу Ургъ’арин кьялан мектебдиъ бицIи классарин мялимди лихуру. 2006-пи йислан 2011-пи йис’ина гъяйизкьан Казбек Зейнудинович Ургъ’арин сельсоветдин депутатди ктагъуру. Хъа 2011-пи йислан 2016-пи йисазкьан Ургъ’арин дерейиан Хив райондиз вуйи депутатди ктагъуру. 2012-пи йислан 2018-пи йисазкьан Ургъ’арин кьялан мектебдин директорди гъилихну. 2018-пи йислан гъябгъюрайи йисан 27-пи августдизкьан райондин образованиейин отделин начальникди лихуру. 2019-пи йисан 27-пи августдиъ Хив райондин культурайин, спортдин, жигьиларин политикайин ва туризмдин отделин начальникди дерккру.
Гьамус кьюб келима Хив райондин образованиейин отделин цIийи начальникдиканра пидихьа.
Назаряли Тарланов 1968-пи йисан 10-пи августдиъ Хив райондин АрхъитI гъулаъ бабкан гъахьну. АрхътIарин гъулан кьялан мектеб дугъу 1985-пи йисан ккудубкIуру. Мектеб ккудубкIбалан кьяляхъ, 1986-1988-пи йисари Назаряли Аслановичди армияйиъ чан буржи тамам гъапIну. 1989-1994-пи йисари дугъу ДГУ-йин математикайин факультетдиъ урхуру ва думу заан аьгъювалариинди ккудубкIуру. 1995-пи йислан 2001-пи йис’ина гъяйизкьан Назаряли Тарланов АрхътIарин кьялан мектебдиъ физикайин дарсар кивру мялимди лихуру. Хъа 2001-пи йислан 2015-пи йис’инакьан АрхътIарин кьялан мектебдин директорди лихуру. 2016-пи йислан 2019-пи йис’ина гъяйиз дугъу МКУ «методкабинетдиз» регьбервал туври гъухьну. Дугъан ляхниъ хъуркьувалар айивализ лигну, 2019-пи йисан 27-пи августдиъ думу «Хив район» МО-йин образованиейин отделин руководителди дерккру.
Дурариз цIийи гъуллугъариъ ужудар сяътар, хъуркьувалар ва ужуб, бегьерлу йис хьувал марцци кIваан ккун апIурахьа.
