Улихьна йигъари Дагъустандин Огни шагьрин администрацияйин ЗАГС-дин отделин заведующий Жанна Гьялимовайихъди гюрюшмиш гъахьунза ва дугъахъди сюгьбат гъубхунза. Ич арайиъ гъабхьи сюгьбат жикъиди исихъ чап апIурача.
– Жанна Гьялимовна, Дагъустандин Огни шагьриъ ЗАГС-дин заведующийди лихури хайлин вахт вуяв, думу вахтнан арайиъ ичв отделиъ фицдар дигиш’валар арайиз гъафну?
– Ихь Дагъустандин Огни шагьрин ЗАГС-дин отделин заведующийин вазифйир узу 2012-пи йислан мина кIулиз адагъураза. Ич отделин асас ляхниъ дидхъан мина гъийин йигъазкьан дицикьан аьхю дигиш’валар гъахьундар.
– Ичв отделин асас ляхин фу ву?
– Ич отделин асас ляхин бабкан гъахьи бицIидар, кечмиш гъахьидар, нюкгьиъ учIврудар, нюкягь чIюбгърудар, байвализ гъадагърудар, абавал тяйин апIрудар ва гьацдар жара касар гьисабназ гъадагъувал ва дурариз тялукь документ тувувал ву.
Дагъустандин Огни шагьур бицIиб дар, мушваъ сумучIур агъзуртIан артухъ инсанар дуланмиш шула. Гьаддиз Дагъ. Огни шагьриъ тялукь документар гъадагърударин кьадарра бицIиб дар. Аьхиримжи вахтна гъудургу документарин ерина цIийидар гъадагърударин, документ абцIруган гъалатI дубхьну, думу цIийибдихъди гьюдюхрударин кьадар артухъ дубхьна.
– Уву гъапиганси, ичв отдели ихь райондиъ бабкан гъахьи бицIидар ва кечмиш гъахьидар, нюкгьиъ учIврудар ва нюкягь чIюбгърудар гьисабназ гъадагъуру. Дурарин кьадар йислан-йисаз фици дигиш шула?
– Ав, думу вазифйир ич отдели тамам апIурайидар ву. Мисалназ, 2018-пи йис гъадабгъурхьа. Гьадму йисан ихь райондиъ вари сабишв’инди 581-дихьна бицIир бабкан гъахьну. Кечмиш гъахьидар 197 ву. Ккудубшу йисан 244 кас нюкгьиъ учIвну, гьадму гьисабнаан нюкягь чIюбгъбан 118 дюшюш гъахьну. Хъа 38 касди абавал тяйин гъапIну.
Саризра жиниб дар, советарин уьлкейин девриъ ихь Дагъустандин Огни шагьриъ бабкан шлу бицIидарин кьадар аьхюб вуйи. Гьаз гъапиш, мушваъ табасаран халкьдин вакилар гизаф дуланмиш шула, ва табасаранар ихь уьлкейъ чпин хизанариъ гизаф бицIидар уьрхру миллетарикан гьисаб шула.
Думуган гьарсаб хизандиъ кьялан гьисабниинди 7-10 бицIир ади шуйи. Кечмиш шлу бицIидарин кьадарра цIиб гъабхьнийи. Гьамус яваш-явашди агьалйирин яшайиш ужу шула. Гьаддихъди сабси, бабкан шлу бицIидарин кьадарра артухъ хьуз хъюбгъра. Дупну ккундики, аьхиримжи йисари кечмиш шулайи бицIидарин кьадар цIиб шула, гьаз гъапиш медецинайин ужагъариз духнайи гъийин деврин тIалабариз жаваб тувру оборудованиейин эгьмият аьхюб ву.
Мушвахъди къайд апIуз ккундузузки, 2018 йисан Жанна Гьялимовна «Йиз Дагъустан» кIуру конкурсдиъ иштирак гъахьну ва, ужур пешекер ву кIури, думу гъалибвалин сабпи йишван сагьиб гъахьну. Гъит, дугъаз гележегдиъ хъана аьхю хъуркьувалар ишри.
