Сентябрин 2-пи йигъан (цци 1-пи сентябрь элгьет йигъ вуйи), ихь уьлкейин вари мектебариъси, Табасаран райондин Р. Гьясановдин ччвурнахъ хъайи Хюрккарин кьялан мектебдиъра цIийи урхбан йис ккебгъбахъди аьлакьалу вуйи серенжемар кIули гъушну. Думу йигъан баяр-шубар мектебдиз аьхю мяракайиъ иштирак’вал апIурайидарси дуфнайи.
Гьелбетда, аьгъюваларин Йигъ аьхю машквар хьузра ву. Думу аку йигъ фици аьхю машквар дарди шулухъа, вари уьлкейиъси, вари дюн’яйиъра къайд апIурайиб вуйиган? Хъа сабпи ражари сабпи классдиз гъюрайидариз думу йигъ асасуб вуйи.
Классарин кIулиъ айидарра улихь хьади, вари баяр-шубар ва мялимар уч гъахьиган, аьгъюваларин Йигъаз бахш дапIнайи йигъинжагъ мектебдин классдиъ дару ляхнарин тешкилатчи М.Б. Аьзизовди ачмиш гъапIнийи. Урхурайидар чан терефнаан тебрик апIбалан кьяляхъ, дугъу удучIвну улхуз гаф мектебдин директор З.Р. Аьлимирзаевдиз тувнийи.
Директорира чан улхбаъ баяр-шубар ва мялимар урхбан цIийи йис улубкьбахъди тебрик гъапIнийи. ДумутIанра савайи, З.Р. Аьлимирзаевди ккудубшу урхбан йисан алахьу читинваларикан, вари классариз гьуркIну учебникар адарди гъхьиваликан, ккудубшу урхбан йисан урхбанна тербияйин ляхниъ гъузу камиваларикан ва хъуркьуваларикан гъапнийи. Дугъу чан улхбаъ 11-пи классдин вари выпускникари ЕГЭ хъуркьувалиинди тувуваликан ва вари выпускникари аттестатар гъадагъуваликан разиди къайд гъапIнийи. Директори чан улхбаъ цци 11-пи классариъ урхурайидарикан урхбаъ артухъси зегьмет зигувал ккун гъапIнийи, дарсар кьимат бадали ваъ, хъа аьгъювалар бадали урхуб лазим вуйиваликан гъапнийи.
Директорин улхуб ккудубкIбалан кьяляхъ, удучIвну улхуз гаф 11-пи классдиъ урхурайи Гь.-Ш. Рашидовдиз ва З.А. Рамазановайиз тувнийи. Дурари мялимарин терефназ баркаллувалин гафар гъапнийи, дурариз мюгькам сагъ’вал ва тамам апIурайи ляхниъ хъана зурба хъуркьувалар хьуб, хъа чпиз ва чпин юлдшариз, урхбан йисан аьхириъ заан хъуркьувалар гъазанмиш апIбан бадали, артухъси зегьмет зигуб ккун гъапIнийи.
Баяр-шубарин улхбарин кьяляхъ, М.Б. Аьзизовди удучIвну улхуз гаф педагогвалин ветеран Гь. Гьяжиевдиз тувнийи. Дугъу чан улхбаъ урхурайидар, мялимар, серенжемдиз уч духьнайи хялар ва, асас вуди, сабпи ражну сабпи классдиз дуфнайи баяр-шубар маракьлу улхбиинди тебрик гъапIнийи.
Му улхбарин кьяляхъ серенжемдин асас пай – сабпи ражари сабпи классдиз дуфнайи баяр-шубариз сабпи зенг йивувал кIули гъубшнийи. Думу ляхин 9-пи классдин ученик Шамил Мягьямедовдиз ва сабпи ражари 1-пи классдиз дуфнайи Зухра Байрамбеговайиз табшурмиш гъапIнийи. Чпиз туву табшуругъ дурари ла-йикьлуди тамам гъапIнийи.
Серенжемдин аьхириъ мектебдин художествойин самодеятельностдин кружокдин вакилари бицIи концерт улупнийи. Концерт З. Мамедовайи ва Ф. Исрафиловайи кIули гъубхнийи.
