Сентябрин 2-пи йигъан Табасаран райондин мектебариъ цIийи урхбан йис ккебгъбахъди аьлакьалу серенжемар кIули гъушну.
Райондин баяр-шубар аьгъюваларин Йигъахъди тебрик апIуз республикайин меркез вуйи Мягьячгъала шагьрианра хялар гъафнийи: РД-йин сагъламвал уьбхбан министр Жамалудин Гьяжиибрагьимов, Дагъустандин Халкьдин Собраниейин депутат Алавудин Мирзабалаев. Дурар Табасаран райондин глава Мягьямед Къурбановдихъди сифте Хючнаарин 2-пи нумрайин кьялан мектебдиз лигуз гъушнийи, хъасин Хючнаарин сабпи нумрайин кьялан мектебдиз гъафнийи. Хючнаарин 1-пи нумрайин мектебдиъ шадвалин линейка ккебгъайиз, думу делегацияйин вакилар мектеб цIийи алапIбан ляхнариз гъилигнийи ва дапIнайи ляхнариз ужуб кьимат тувнийи.
«150-мектеб» проектдин дахилнаъди му мектеб цIийи алапIну. Шадвалин линейка Хючнаарин сабпи нумрайин мектебдин директор Жейран Къулиевайи ачмиш гъапIнийи. Дугъу бицIидар ва мектебдин мялимар урхбан ккебгърайи цIийи йисахъди тебрик дапIну, дурариз хъуркьувалар ккун гъапIнийи ва ццийин урхбан йисан мектебдиъ гьял дапIну ккуни месэлйирикан гъапнийи. Гьацира линейкайиъ РД-йин сагъламвал уьбх-бан министир Жамалудин Гьяжиибрагьимовра удучIвну гъулхнийи. Дугъу учв мялимдин хизандиъ тербияламиш гъахьиваликан, чан гъардшари гьаму мектебдиъ кьялан образование гъадабгъуваликан, Хючнаарин 1-пи нумрайин кьялан мектеб гьарган, райондинси, республикайинра ужудар мектебарин жергейиъ айиваликан, гьамус душваъ урхурайидарира дидин ад хъана за апIруси аьгъювалар гъадагъну ккуниваликан гъапнийи.
Дагъустандин Халкьдин Собраниейин депутат Ала-вудин Мирзабалаевди чан удучIвну улхбаъ, мектебдиъ урхурайи баяр-шубарихьинди илтIикIну, къайд гъапIнийи: «Гьарган улихь гъягъюз, варибдикан аьгъю апIуз кьаст ади, мянфяаьтлуди вахт адапIай. Учву, гъийин бицIидар, закурин гележег вучва. Ягъурлу рякъ ибшричвуз!».
«Табасаран район» МР-ин глава Мягьямед Къурбановди чан удучIвну улхбаъ ццийин йисан Хючнаарин 1-пи нумрайин кьялан мектебдин 100 йис шлувал кIваин гъапIнийи.
«Саб аьсрин арайиъ мушваъ агъзрариинди баяр-шубари аьгъювалар гъадагъну, дурари, уьлкейиз, халкьдиз вафалу инсанар духьну, зегьмет гъизигну ва зигура. Учву, сабпи ражари сабпи классдиз дуфнайидар, мектебдиъ урхурайидар вари гьадму машгьур инсанарин жергейиъ хьуз, ужудар аьгъювалар гъадагъуз чалишмиш йихьай. Учвуз аьгъюваларин ярхи рякъюъ гьарган ягъурлувал ибшри!» – гъапнийи Мягьямед Къурбановди.
Къайд дапIну ккундуки, 2019-пи йисан Табасаран райондин выпускникари гъадагъу 19 гъизилин медаликан 3 гъизилин медаль Хючнаарин 1-пи нумрайин кьялан мектебдин выпускникари гъадагъдар ву. Мектебдин линейкайиъ удучIвну улхбар ккудукIбалан кьяляхъ, мектебдиъ урхурайи бицIидари чпи гъязур гъапIу жикъи концерт улупнийи.
Хючнаарин сабпи нумрайин кьялан мектеб Табасаран райондин аьхюдарсдар мектебарикан саб ву. Дидин тарих 1919-пи йислан ккебгъра. Му мектеб чан ляхнин къайдйириинди, дурар йислан-йисаз цIийи алаурайивалиинди ва гъазанмиш апIурайи хъуркьувалариинди тафавутлу ву.
Гъи «Хючнаарин 1-пи нумрайин СОШ» МКОУ, гъябгъюрайи девриз тялукь вуйи технологйир ишлетмиш апIури, аьгъювалар тувбан цIийи къайдйир агру, дурар ляхниъ ишлетмиш апIру ва заан хъуркьувалар гъазанмиш апIру центриз илтIибкIна. Думу «Табасаран район» МР-ин образованиейин Управлениейин бинайин мектеб ву.
Хючна гъулаъ сабпи мектеб 1919-пи йисан тешкил гъапIну. 1936-пи йисан думу тамам дару кьялан мектебдиз, хъа 1945-пи йисан тамам вуйи кьялан мектебдиз илтIибкIну. 1947-пи йисан дидин сабпи выпуск гъабхьну. Думуган выпускникарин кьадар 5 кас вуйи. Думу выпускдиан вуйи Олег Борисов геологияйин илмарин доктор, академик гъахьну. Къазиаьгьмад Рамазанов машгьур Табасаран шаир, гьюкуматдин бажаранлу гъуллугъчи, хъа Иса Аьзизов – машгьур мялим ву.
1947-пи йислан мина гъийин йигъазкьан му мектеб юкьуд агъзуртIан артухъ баяр-шубари ккудубкIну. Ццийин йис Хючнаарин сабпи нумрайин кьялан мектебдин юбилейин йис ву, дидин 100 йис шула.
