Урхбан йис ккебгъувал – му бицIидариз ва аьхюдариз гьарган машквар ву. Ухьу гьарган ухьуз ужуб насигьят туву ихь сарпи мялим, мектебдин юлдшар, тербиячйир аьхю разивалиинди кIваин апIури шулхьа.

Сентябрин кьюдпи йигъан республикайин мектебари 418 агъзур урхурайидарин улихь чпин раккнар ачмиш апIиди, гьадму кьадарнакан 52 агъзур баяр-шубар сабпи классдиз гъягъиди.

Заан ери айи образованиейихъди тямин апIувал, инсандин артмиш’вализси, Дагъустандин улихь дийигънайи зурба месэлйир хъуркьувалиинди гьял апIбан бадалира чарасуз лазим вуйи шартI ву. Урхбан гьаму йисаз мектебариз 2 миллионтIан артухъ китабар масу гъадагъна, гьадму кьадарнакан 150 агъзур китабар – милли чIалариинди вуйидар. 2018-пи йисан 140 автобус масу гъадагънийи ва гьаму йисан аьхириз 95-сана мектебдин автобусар гъадагъбанди ву. Федералин ва республикайин бюджетариан вуйи дакьатарихъ 10 агъзур бицIириз йишв айи 34 мектеб ачмиш апIувал планламиш дапIна. «100 мектеб» проектдин дахилнаъди 2018-пи – 2019-пи йисари гьюкуматдин ва дилаварчйирин дакьатарин кюмекниинди 334 мектеб рас апIбанди ву.

Му ляхниъ рягьимлувалин кюмек гъапIдариз аьхю вуйи чухсагъул. «Гъулан мялим» программайиз асас вуди, гъуларин мектебариъ ляхин апIувал ктабгъу вузарин 50 выпускникдиз гьаруриз рес-публикайин бюджетдиан са-саб миллион манат пул жара дапIна.

Ухьу ихь баяри «Узу пишекар вуза» вари Урусатдин олимпиадайиъ, «Йиз уьлке – йиз Урусат» конкурсдиъ, «Жигьил пишекрар» Ворлдскилс чемпионатдиъ гъадагъу гъалибвалариин шад вухьа, мектебар ккудукIу 24 бали ва шуру ЕГЭ-йиан 100 балл гъадагъну, хъана жара хъуркьуваларра гизаф а.

Дагъустанди чпиинди дамагъ апIурайи веледар тербияламиш гъапIу абйир-бабариз ва мялимариз аьхю чухсагъул!

Вари урхурайидариз шадвал, цIийи хъуркьувалар, ужуди урхувал, хъа мялимариз пишекарвалин хъуркьувалар, мюгькам сагъ’вал ва хушбахтвал ккун апIураза.

Дагъустан Республикайин Глава В.Васильев