Ухьуз варидариз мялум вуйиганси, сентябрин 28-пи йигъан Табасаран райондин 90 йис тамам хьпаз бахш вуди, райондиъ юбилейин серенжемар кIули гъягъиди. Шадлугънан серенжемарин улихь муниципалин райондин гъулариъ марццишин апIбан ва къайда дебккбан бадали, 2019-пи йисан 14-пи ва 21-пи сентябриъ райондин вари гъулариъ аьтрафар марцц апIбан субботникар гъахувал планламиш дапIна.
Райондин администрацияйи гъуларин поселенйирин главйириз, карханйирин, тешкилатарин, идарйирин кIулиъ айидариз муниципалин образованиейин аьтрафар марцц апIбан ляхин тешкил апIувал табшурмиш дапIна.
Табасаран райондин аьтрафариин 14-пи ва 21-пи сентябриъ субботникар гъахбахъан жавабдарвал райондин администрацияйин главайин заместитель Заур Мусаевди гъабхиди.
