«Табасарандин нурар» газатдин редакцияйи Табасаран райондин 90 йисандин юбилейиз бахш вуди мектебариъ урхурайи баяр-шубарин арайиъ багъри райондикан ва гъулкан варитIан ужуб шиир, ихтилат бикIбаз вая дурарин шикил зигбаз конкурс тешкил гъапIнийи. Яратмишар гъябгъюрайи йисан 15-пи сентябризкьан газатдин почтайиз (zori56@yandex.ru) хъадаъну ккундийи. Конкурсдиз яратмиш апIбар хътаувал аьхирихъна гъюра. Хъа учу конкурсдиз хъадаънайи аьхиримжи шиърарихъди ва сочинениейихъди учву таниш апIурача.
Ишрибика Рамазанова,
6-пи класс, Хюрккарин кьялан мектеб
Йиз гъул
Ягъал дагъдиин ализ йиз хал,
Юкьуб тереф рякъюйзуз дагълар.
ГъвачIнин ухди гьудужвну,
Штуз гъягъюрза мичIли булагъдиккна.
Му гъулаъ айич аьлимар,
Гьарсаб хулаъ айич жюрбежюр устйир.
Гъулан кьялаъ булагъ айич,
Сифар’ан рубзури шид ицциб.
Гъул ухшар ву женнетдиз,
Дишагьлийир, кIуруш, гьюри-перйириз,
Жигьилар ву игитар халис,
Гюзел йишв ву йиз Хюрикк гъул.
Ягъал дагъларин кьялаъ,
Сикин ва бахтлу гъулаъ,
Кьюб бицIи нирин кьялаъ,
Багъри юрднан мюгькам гъянаъ
Аьмалназ дуфнайи женнет,
Шак дарди ву Хюрикк, гьелбет.
Самира Аьлимирзаева,
9-пи класс, Халагъ гъулан кьялан мектеб
Йиз багъри Халагъ гъул
Багъри Ватан, Халгъарин гъул,
Йиз кIван вува абур, асул.
Табиаьтдин утканвал яв
Дюн’яйиин сабпиб вуяв.
Юкьуб тереф дагълар, багълар,
Сив’анмина гъюрай нирар.
Гьяйран шул ув’ин инсанар
Ккуни Ватан, Халгъарин гъул.
Сес атIабгна багълариъ,
Сес атIабгна дагълариъ
Ахмиш шулай нирарин.
Жан, багъри гъул, Халгъарин!
Йиз багъри гъул
Узу, Аьлимирзаева Самира, Халагъ гъулаъ бабкан гъахьунзу. Гьаддиз лигну, узуз йиз багъри Халагъ гъулкан нубатнан сочинение бикIуз ният гъабхьнийиз. Халагъ гъул Табасаран райондин заан гъуларикан саб ву. Ич гъул Кьаркьул ва Жуф дагъларин арайиъ ерлешмиш дубхьна. Дидин гъирагъарихъ гюрчег багълар, дагълар, яркврар, гъярар хъайич. Ухьуз аьгъюганси, ихь Дагъустан дагъларин ва нирарин перд вуйихь. Гьадму нирарикан кьюб Халагъ гъулан гъирагъдихьан ахмиш шула. Дурарин ччвурар Рубас ва Афначай ву.
Ич гъулан тарих 1233-пи йисан хиджрайихъди арайиз дуфна.
Мушваъ йирхьуб мягьял а: Асккнар, Заънар, Улхьан кьярар, Кьялхъян кьярар, Къузбун’яр, Савлар. Гъулаъ варжтIан артухъ хизанар яшамиш шулайич. Халагъ гъулаъ аьхю мягьял, кьялан мектеб, бицIидарин багъ, культурайин хал ва юкьуб-хьуб тукан айич.
Улихь вахтари ич гъул устад халачичйириинди машгьур вуди гъабхьну.
Агьалйирин арайиъ гизаф аьхю гьюрмат, мясляаьт а. Кюмек ккун гъабхьиган, сар-сариз кюмек апIури шулу.
Узуз йиз гъул гизаф багьа вузуз. Узу жара йишвариз гъушишра, Халагъ гъулаз гъюз ккун шулиз.
