Сентябрин 11-пи йигъан РД-йин Глава Владимир Васильев БотIлихдиз Ватандин Аьхю дявдиъ, Афгъанистандиъ, 1999-пи йисан август-сентябрь вазариъ Дагъустан Республикайиъ гъахьи ва жара дявдин женгариъ гъийиху БотIлих райондиан вуйи эскрарин гьюрмат уьбхбаз бахш дапIнайи ядигар ачмиш апIбан серенжемариъ иштирак хьуз гъушну.
Серенжемдиз уч духьнайидарихьинди илтIикIну, дугъу чан улхбаъ гьамци гъапнийи: «Гьаму сентябрин йигъари ухьу лап важиблу вакъиа къайд апIурахьа – Дагъустандин ругариин алархьу вари халкьарин террористарин дестйир дагъитмиш дапIну 20 йис тамам хьувал. КIваин апIинай, аьхюдар, дурар фицдар йигъар вуйиш: Советарин Союз ккадабхънайи, жямяаьтлугъ сар-сарихьан жара, русвагь духьнайи, 70 йисандин муддатнаъ халкьарин арайиъ мюгькам апIуз гъахьи дуствалин багьалу аьлакьйир гъудургнийи, жямяаьтлугъдин арайиъ гучI абхънайи. Гьадмугандин регьбрари уьлке цIийи жюрейин артмиш’валихъна хурайи. Амма халкьдиз чпин ва чпин хизанарин гележег думу цIийи девриъ рябкъюрадайи. Иллагьки гьадму шартIариъ вари дюн’яйин бедбахтвали ихь уьлкейиз рякъ гъабгну. Дагъустанлуйири чиб, чпин хизанар, багъри Ватан уьбхювалиинди вари Урусатдиз чешне улупну Дагъустандиъ ва Урусатдиъ вари деврариъ гьаци вуйи – халкьди гьаммишан ватанпервервалин тереф уьбхюйи.
1999-пи йисан дяви Дагъустандин саки гьарсаб хизандиъ убчIвну. Дидиъ иштирак гъахьи ва чпин жанар ватан уьбхюз фида гъапIу гьарсар игитрин ччвур гьаммишандиз халкьдин кIваъ гъубзди. ЦIумада, Новолак, БотIлих районариъ хайлин ислягь ватандашариз зарар гъабхьну. Дявдин женгариъ 226 эксер, 53 айтIан ляхнарин гъуллугъчи, 25 жвуван хушниинди ватан уьбхюз гъудужву касар, 108 ислягь ватандашар гъийихну. Думу дявди сагъ даршлу зийнар гъитну», – гъапну Главайи.
Владимир Васильевдин гафариинди, жвуван хуш’валиинди халкьдикан уч гъапIу кьушмин вакилариз дявдин гьяракатарин ветеранарин статус тувбан гьякьнаан Урусатдин Федерацияйин къанун кьабул апIували, уьлкейин кIулиъ айидари дагъустанлуйирин игитвализ заан кьимат тувувал тасдикь апIура.
«Му гьюкмин кIулиъ айидарин ва Урусатдин Президентдин заан кьимат ву. Узуз гъи чпин хушниинди ватан уьбхюз гъудужвдариз гьюрматнан медалар тувуз мумкинвал гъабхьивалиин дамагъ апIураза. Учвуз гьюрматнан ва чухсагъул мялум апIбан гафар кIури, хъуркьувалар, сагъ’вал ккун апIури, гележегдиъ ихь Дагъустан мублагъди артмиш хьувалин, ихь веледар, гафариинди ваъ, хъа гьякьлу ляхнариинди бахту гележегдин эйсйир хьуз заминвал апIуз ккундузуз. Хъа гьаци шлувалиин умудлура вуза. Гъи гьамушв’ин сабансана ражари гьадму игитар аьхю ва тербияламиш гъапIу абйир-бабариз ва вари ихь халкьариз чухсагъул мялум апIуз ккундузуз. Учву, гьадму женгнаъ сатIи духьну, миллетарин сабвал ва ватанпервервал, кьягьялвал ва яракьалмиш духьнайи душмандиз къаршувал улупунчва», – гъапнийи Владимир Васильевди.
Къайд апIуз ккундучуз, игитарин гьюрмат уьбхюри абццу ядигар Ватандин Аьхю дявдин эскрарин, эскер-интернационалистдин ва халкьдин терефнаан чан хуш’валиинди ватан уьбхюз гъудужву вакилин суратариан гьязур гъапIуб ву. Ядигариъ думу вари суратар гъарз’ан утIукна.
