Гьаму йигъари Мягьячгъала шагьриъ Авар театрин фойейикк Дагъустандин халкьдин шаир Расул Гьямзатов кIваин уьрхбаз бахш дапIнайи шикларин выставка гъабхьну.
Серенжем ЮНЕСКО-йин лишниккди гьар йисан респуб-ликайиъ гъабхурайи вари халкьарин «Лизи кьарнийир» фестивалин дахилнаъди тешкил гъапIуб вуйи. Душваъ Урусатдин жюрбежюр регионариан дуфнайи писателарин делегация, жямяаьтлугъ вакилар, республикайин мектебариъ урхурайи баяр-шубар, Франция гьюкуматдиан дуфнайи хялар иштирак гъахьнийи.
Вари халкьарин жямяаьтлугъ Расул Гьямзатовдин фонднан кIулиъ айи ихь ватанагьли Гьябибат Аьзизовайи чан удучIвну улхбаъ къайд гъапIганси, цци Дагъустандин халкьдин шаир Расул Гьямзатов бабкан духьну 96 йис гъабхьну.
«Расул Гьямзатов халкьарин арайиъ ислягьвал, сабвал уьрхюз, дуствалин аьлакьйир мюгькам апIуз дих апIури, вари дюн’яйин 100-тIан артухъ харижи уьлкйириз «халкьдин дипломатияйин» гьюрматнан вазифа хьади гъушну. Дугъу. дюн’яйин жюрбежюр уьлкйириъ яшамиш шулайи халкьар мюгькамди ислягьвал уьбхбахьна жалб апIури, дюн’яйин миллетарин культурйирин жюрбежюрвал хъана кьувватлуди артмиш апIбахьна, жюрбежюр уьлкйирин жямяаьтлугъ ва рягьимлувалин ляхнар кIули гъахру тешкилатарин юлдаш’валин аьлакьйир сатIи апIбахьна рякъяр агури гъахьну. Думу вари дюн’яйин ислягьвалин лишан улупурайи инсан вуйи», – гъапну Гьябибат Аьзизовайи.
Серенжемдиъ Каспийскдин кадетарин мектебдиъ ва Мягьячгъала шагьрин 15 ва 18-пи нумрйирин мектебариъ урхурайи баяр-шубари, гьацира Францияйин «Ватан» кIуру Кавказдин культурайин центриан дуфнайи хялари Расул Гьямзатовдин шиърар гъурхнийи.
Авар театрин директор Мягьямедрасул Мя-гьямедрасуловди къайд гъапIганси, гьаму жюрейин серенжемари ихь машгьур шаирин ирс уьбхюз, аргъаж шулайи наслин Расул Гьямзатовдин яратмиш апIбарихьна вуйи маракьлувал мюгькам апIуз мумкинвал тувра.
Республикайиъ кIули гъубшу выставка Расул Гьямзатов гъахьи вари уьлкйириз гъабхуз планламиш дапIна.
Серенжемдиъ РД-йин писателарин Союздин председатель Мягьямед Аьгьмедов, «Лизи кьарнийир» вари халкьарин фестивалин иштиракчйир, уьлкейин машгьур шаирар Иван Голубничий, Владимир Сорочкин, «Йитимар адру Дагъустан» жямяаьтлугъ рягьимлувалин тешкилатдин кIулиъ айи Раисат Мягьямедова, Расул Гьямзатовдин риш, ДМИИ-йин директор Салихат Гьямзатова ва жарадар удучIвну гъулхну.
