Сентябрин 11-пи йигъан РД-йин Правительствойин Председателин заместитель – РД-йин образованиейин ва илимдин министр Уммупазиль Уьмаровайин табшуругъниинди Табасаран райондин глава Мягьямед Къурбанов райондиъ «Земский учитель» проектдиинди лихурайи жигьил мялимарихъди гюрюшмиш гъахьну.

 

Гюрюшдиъ гьацира райондин администрацияйин главайин заместитель Заур Мусаев, райондин УО-йин начальник Аьбдусалам Гьясанов, проектдиинди жигьил мялимар лихуз гьаънайи мектебарин директорар ва гъуларин поселенйирин главйир иштирак гъахьну. Табасаран райондин ГьепIларин СОШ-диз, Бургьанкентдин СОШ-диз ва Ягъдигъарин 2-пи нумрайин СОШ-диз урус чIалнаан ва литературайиан, харижи чIалнаан ва математикайиан дарсар кивру мялимар гьаъна.

Гюрюшдиъ райондин главайи жигьил мялимарин яшайишдикан, арайиъ айи жюрбежюр месэлйирикан гьерхнийи. Дугъу къайд гъапIганси, гьаму йисан Дагъустандиъ «Земский учитель» проект тазади уьмриз кечирмиш апIуз хъюгъна. Проект республикайин мектебариъ мялимар гьуркIри адрувалихъди аьлакьалу вуди гьяракатнаъ ипуб ву. Проектдиъ иштирак хьпан ва гъулариз гьаъбан бадали, 50 мялим гъядягънийи, гьадрарикан 4 кас Табасаран райондиз гьаъну. Дурариз гьаруриз чпиз халйишв масу гъадабгъуз са-саб миллион манат тувди. Проектдин тIалабариинди, жигьил мялимар гъулан мектебдиъ 5 йисан дилихну ккунду. Мягьямед Къурбановди къайд гъапIганси, 2020-пи йисан му проект федералин дережайиъди кьувватнаъ убчIвди, думуган проектдиъ иштирак шлу мялимарин кьадарра за хьибди.

«Учу учв’ин гизаф шад вуча, ич умудар кIулиз адагъур ва ляхниъ заан хъуркьувалар улупур кIури, учвук умуд киврача. Хъа учу ич терефнаан учвуз лазим вуйи кюмек тувуз гьязур вуча», – гъапну райондин главайи жигьил мялимариз.

Гюрюшдиъ иштирак гъахьи мектебарин директорари ва гъуларин поселенйирин главйири дуфнайи мялимар ляхин апIуз ва яшамиш хьуз лазим вуйи вари шартIарихъди тямин дапIнайиваликан, гележегдиъра кюмек тувуз чпи гьязур вуйиваликан гъапнийи.