Сентябрин 13-пи йигъан ужуб юкIв айи, жара касдин хайир ккуни ва дугъан гъайгъу зигру, рягьимлу ва мерд кас, гьаммишан кIвантIарикк инчI ккади гафар апIру сюгьбатчи, гафнан устад, бажаранлу журналист Буньямин Багъдаев 69 йисан яшнаъ ади ихь арайиан гъушну.
Буньямин Зиявудинович Багъдаев 1950-пи йисан 3-пи январиъ Хив райондин Мажвгул гъулаъ бабкан гъахьну. 1964-пи йисан Мажвгул 8 йисандин, хъа 1966-пи йисан ГъванцIил гъулан кьялан мектебариъ дурхну, дугъу 1973-пи йисан Мягьячгъалайиъ Дагъгосуниверситетдин математикайин факультет, 1976-пи йисан Москвайиъ ВЛКСМ-дин ЦК-йин ВКШ-йин журналиствалин отделение ккудукIну. Мажвгларин кьялан мектебдиъ аьхюну пионервожатыйди ва мялимди, ВЛКСМ-дин Хив райкомдин сифте кьюрпи, хъа сарпи секретарди гъилихну. Дагъустандин комсомолин обкомдин аппаратдиъ, профсоюзарин органариъ, республикайин радиовещаниейин редакторди, республикайин «Табасарандин нурар» газатдин редакторин заместителди, Мягьячгъала шагьрин муниципалин гъурулушдин газатариъ редакторди гъилихну. Саб вахтна халачйир гьясил апIру «Хив» объединениейин генеральный, хъасин коммерческий директорди, халкьдин мяишатдин жара гъуллугъариъ гъахьну.
Буньямин Багъдаев багъри Ватан гизаф ккуни ватанпервер кас вуйи. Дугъу Мажвгул гъул’ан Ватандин Аьхю дявдиъ, Чечен Республикайиъ кIули гъушу гьядисйириъ ва дявдин жара гьяракатариъ иштирак гъахьидарикан китабар гъидикIну ва чапдиан адагъну. Думу кIул’инди 3 китабдин автор ву, 7-8 китабдиз сифтейин гафар гъидикIну. Чан зегьметнан ва устадвалин ляхнариз лигну, думу комсомолин ЦК-йин, дявдин частнан, Мягьячгъалайин администрацияйин ва ветеранарин Советдин, Дагъустандин журналистарин Союздин терефнаан гьюрматнан грамотйириинди лишанлу дапIна. Зегьметнан ветеран, РФ-дин журналистарин Союздин член Буньямин Зиявудиновичди гизаф вахтна «Табасарандин нурар» газатдиъ ва «Дагъустандин бизнес» журналиъ чан юкIв али пише – журналиствалин ляхин апIури гъахьну. 2013-пи йисан апрелихъан мина 2016-пи йисазкьан газатар, журналар адагъру «Дагъустандин бизнес» центрин генеральный директорди гъилихну. Дугъан варжариинди макьалйир республикайин газатариъ ва журналариъ чап дапIна.
Ав, дугъан кIваъ ихь халкь, Дагъустан бадали вуйи зегьметнан планар гизаф амийи. Мицир кас арайиан гъягъювал багъридаризси, багахьлуйиризси, табасаран халкьдизси, вари дагъустанлуйиризра учIврушин ву.
Буньямин Зиявудинович ихь фикриан дугъан макьалйирира ва китабарира кIваълан гъягъюз гъитидар. Думу архаин хулаъ сикин апIуз Дагъустандин вари районариан, шагьрариан, хайлин гъулариан варжариинди мялимар, аьлимар, шаирар гъафнийи.
Багахьлуйириз ва Буньямин Багъдаев таниш вуйидариз Аллагьди сагъ’вал ва дурарин кIваз сабур туври!
***
Республикайин «Табасарандин нурар» газатдин коллективди Багъдаев Буньямин Зиявудинович кечмиш хьувал дерин пашманвалиинди къайд апIури, газатдин редакцияйиъ лихурайи дугъан швушваз Эльмира Багъдаевайиз, вари багахьлуйириз ва мирасариз башсагълугъвал ккун апIура.
