Гьаму йигъари Хив райондин культурайин, спортдин, жигьиларин политикайин ва туризмдин отделин начальник Казбек Къазиевди, райондиан делегацияра хъади гъулариз гъягъюри, культурайин хуларин, библиотекйирин аьгьвалат, душваъ лихурайидариз алахьурайи читинвалар ахтармиш гъапIну.

 

Сифте Казбек Къазиевди Хив райондин культурайин Хулаъ райондин вари гъуларин культурайин хуларин директорарихъди, художествойин самодеятельностдин руководителарихъди, библиотекйирин заведующйирихъди совещание гъубхнийи. К. Къазиевди, культурайин, театрин ва туризмдин Йисси мялум дапIнайи 2019-пи йисан Хив райондиъ культурайин цирклиъ кIули гъягъюрайи серенжемарикан доклад гъурхнийи. Докладдиъ дугъу гъи гьюкуматдин терефнаан культурайиз туврайи фикрикан, йислан-йисаз диврайи цIийи дараматарикан ктибтнийи, ва гьаддихъди сабси гъийин йигъан культурайиз зат фикир тутруврайи жигьиларикан, чпи культурайин хуларин директорар вушкьан аьгъдру касар айиваликанра гъапнийи.

«Ав, гвачIнинган раккин абццну, хябяхъган думу хъябкьюз бхьуз гъафну кIури, дицир касдиз культурайин хулан директор пуз хай даршул. Эгер жвуву, учв директор вуйивал гьисс дапIну, бицIидарин багъариъ айи баяр-шубарихъди, мектебдиъ урхурайидарихъди, ляхин апIурайи мялимарихъди аьлакьа ади, гьар вазлиъ саб-кьюб шадлугънан серенжемар тешкил апIури гъахьиш, йиз фикриан, гъуландарира дугъаз кьимат тувур ва гъюрайи насларра культурайихьан вархи даршул», – гъапнийи доклад апIурайири.

Казбек Къазиев улхбалан кьяляхъ, культурайин хуларин руководителари ляхниъ чпиз алахьурайи гъулайсузваларикан ктибтнийи.

Аьхириъ К. Къазиевди, вари гъуларин культурайин хуларин гьял фициб вуш ахтармиш апIбан бадали, учв кIулиъ ади йишвариина гъягъбан къарар адабгънийи.

Йикьрар дапIнайиганси, К.З. Къазиев вари гъуларин культурайин хулариз хялижв гъахьнийи. Райондин глава Ярмет Ярметовдихъди мясляаьт дапIну, Фурдагъ, Заан Яракк, Зильдикк ва Ккугъ гъуларин культурайин хулариъ рас апIбан ляхнар ккергъна. Миди вуйи гъулариъра, цалариз гьяк, полиз ва панелиз ширар йивбан ляхнар кIули гъягъюра.