Табасаран райондин – 90 йис

 

Багъри юрд… Фу ву думу? БицIивахтнахъан мина уларикк ккади гъабхьи уткан, жара йишвариъ текрар даршлубсиб табиаьт. Сабпи гамар алдагъу, сабпи гафар, сабпи гьярфар гъудургъу йишв… Гьар вахтна кIваъ гъубзну, фикрариъди, нивкIариъди кьяляхъ хътакру йишв…

Шлиз-вуш – гъул, шлиз-вуш – шагьур…Узузра, ужуди таниш вуйи ккуни йиз гъул, мектеб, бицIи вахтна аьхю гьюкуматси гьибгъри гъабхьи багъри Табасаран район. Йиз багъри юрд – бабан чIалнан дарсар киву институт, тербияйин мукь… Хиял апIин, дюн`яйиъ адар сарун я жара чIалар, я жара юрдар…

Вари гъулариъ яшамиш шулайи инсанарра багахьлуйирси албагну яшамиш шули айи йиз гирами макан!

Ихь халкьдиз «Вари жямяаьтди уф гъапIиш, микI шул» кIуру мисалра а. Дугъриданра, сабхилди гъапIу ужудар ляхнари ухьуз артухъди кьувват тувру. Аьхиримжи вахтна ихь райондиъ духьнайи ва шулайи ужуб терефназди вуйи дигиш`валар рякъруган, ихь артмиш шулайи насларин гележег йигълан-йигъаз ужуб шлувалиин умудлу хьуз шулу. Думу дигиш`валар хьпан бадали, гьарсари чахьан удукьруганси кюмек гъапIиш, харжи даршул.

Ихь багъри Табасаран райондин вакилар 90 йисандин юбилейихъди тебрик апIури, гьарсаб хизандиз, гьарсар инсандиз марцци кIваан мюгькам сагъ’вал, хъуркьувалар, уж`валар ккун апIураза!

Юрдарин тIяаьм

Йиз юрдарин тIяаьм ширин
Наан ашра шулиз кIваин.
Нирин шидси гъяра йисар,
Артухъ апIури кIван гьиссар.
ЮкIвра зигуру дагълариз,
Жилгъйиризди адлу юрднан.
Рякъру нивкIар увкан вуйиз
Багъри йиз юрд,Табасаран!
Багьа вузуз яв кьиматлу,
Аьсрариан гъубзу тарих,
Табиаьтра яв гьяйбатлу,
Увуъ ккебгъу кьисматнан рих…
Йиз юрдарин тIяаьм ширин
Наан ашра шулиз кIваин.

Гьюрматлувалиинди шаир, Урусатдин писателарин Союздин член, Табасаран райондин Вечрикк гъулаъ бабкан гъахьи Шюшеханум Керимова.