Сентябрин 22-пи йигъан ГьепIил гъулаъ «Дагъ-Бары» цалин 56-57-пи нумрайин чIвурдар ерлешмиш духьнайи йишв’ин аьхю мажлис-мевлюд гъабхьну.
Мажлис ГьепIил гъулан имамди лихурайи Аьбдуллагь Аьлиевди ачмиш гъапIнийи. «Гьаму ухьу уч духьнайи йишв лап гирами йишв ву. 1999-пи йисазкьан мушв’ин зикир апIури гъахьну, ва сач мушв’ин цIийикIултIан зикир апIувал ккебгъну.
Гьамус, ГьепIил гъулан агьали Гьяжимурад Аьлиев улихь гьучIвну, гьаму йишвар вари марцц дапIну, яркурра ултIубчну, гьаму чIвурдарин тарихра ахтармиш дапIна. Вари ляхнар албагну, туристар гъюруганси, гьязур апIбанди вуча», – къайд гъапIну дугъу.
Мажлисдиъ РД-йин муфтиятдин кьибла аьтрафарин округдиъ вари ихтиярар айи вакил Аьгьмад Гьаруновди, Табасаран райондин имамарин Советдин председатель Ансар Рамазановди, тарихдин илмарин доктор Руслан Сефербеговди, Табасаран халкьдин агьли касарин Советдин председатель Исамудин Рамазановди, РД-йин культурайин ирснан ядиграр уьрхбан жямяаьтлугъ инспектор, «Дагъ-Бары-Тур» ООО-йин директор Гьяжимурад Аьлиевди, Дербент райондин мярифатнан отделин кIулиъ айи Къурбан Рамазановди, Дербент шагьрин Мягьямед Ярагъийин ччвурнахъ хъайи мистан имам Ризван Гьябибовди, Акъа гъулан имам Рашид Аьлимурадовди ва жарадари иштирак’вал гъапIнийи.
Чан улхбаъ Аьгьмад Гьаруновди мажлисдин иштиракчйириз РД-йин муфтий, шейх Аьгьмад Афандийи терефнаан тебрикнан саламар гъапнийи ва серенжем тешкил гъапIдариз чухсагъул мялум гъапIнийи.
«Ухьу мина диндикан аьгъювалар гъадагъуз дуфнахьа. Ихь Пайгъамбрин гьядисдик гьамци дибикIна: «Учвуз рякъидичвуз лап гюрчег багълар, бахчйир, Аллагь кIваин апIуз амур апIидичвуз. Гьаму дюн’я ухьуз гьарсар касдиз чахьан шлу уж’валар апIуз, Аллагьдихьинди илтIикIну, ухь’ин али шартIар, фарзар тамам апIуз тувна», – гъапнийи дугъу.
Табасаран халкьдин агьли касарин Советдин председатель Исамудин Рамазановди, Табасаран халкьдин кьадарнакан, Табасарандин аьтрафариин ислам дин тарабгъбан гьякьнаан дагъустандин аьлимари духнайи ахтармишарикан чан жикъи улхбаъ, хъа РАН-дин ДФИЦ-дин этнографияйин, археологияйин ва тарихдин институтдин илимдин гъуллугъчи Руслан Сефербеговди дагъустанлуйир сарпидарди ислам кьабул гъапIу халкьарин арайиъ айиваликан, хъа табасаранари ислам VII–X аьсрарин кьюбпи гьацIаъ кьабул апIуваликан ктибтнийи.
Табасаран райондин имамарин Советдин председатель Ансар Рамазановди мажлис тешкил апIуз кюмек туву ГьепIил гъулан имам Аьбдуллагь Аьлиевдиз ва РД-йин культурайин ирснан ядиграр уьрхбан инспектор, «Дагъ-Бары-Тур» ООО-йин директор Гьяжимурад Аьлиевдиз чухсагъул мялум гъапIнийи. Дугъан гафариинди, му жюрейин серенжемари тарихдин ядигарар ва ислам диндин ирс уьрхбаъ важиблу роль уйнамиш апIура. Ансар Рамазановди серенжем кIули гъабх-баъ ужуб иштираквал гъапIу касариз пешкешарра тувнийи. Мажлисдиъ «Гьяйрат» дестейи нашидарра гъурхнийи.
Мажлис сатIи вуйи гъудган апIбиинди ккудубкIнийи.
