Табасаран райондин 90 йисандин юбилейин сяргьятариъди Хюрикк гъулаъ бицIидариз тамшир апIру майдан тикмиш гъапIну. Сентябрь вазлин 28-пи йигъан Табасаран райондин юбилей къайд апIуз гъафи республикайин правительствойин аьхю делегация райондин сяргьятниин дивнайи стелайихъ къаршуламиш апIбан кьяляхъ, думу зат дидрибгъди Хюрикк гъулаъ бицIидариз тикмиш дапIнайи тамшир апIру майдандихьна гъафнийи. Дагъустан Республикайин Главайин ва Правительствойин администрацияйин руководителин заместитель Нюсрет Уьмаров кIулиъ ади, му делегацияйин дахилнаъ Халкьдин Собраниейин депутатар, министрар, бизнесменар, Табасаран райондин глава Мягьямед Къурбанов ва жарадар гъафнийи.
Сяаьт 10-диъ «Шагьрин вари шартIар айи йишв» программайин дахилнаъди тикмиш дапIнайи бицIидарин майдандихьна хюрккарин жямяаьтдин гизаф кьадар вакилар уч гъахьнийи. Дурар бицIидарин майдан ачмиш апIбан шадвалин серенжемдиз гъюрайи республикайин гьюрматлу хялар къаршуламиш апIуз дуфнайидар вуйи. Хялар хъуркьиган, райондин культурайин, спортдин, туризмдин ва жигьиларин политикайин отделин начальник Аьбдулвагьаб Аьбдуловди шадвалин мярака ачмиш гъапIнийи. Дугъу удучIвну улхуз гаф «Табасаран район» МР-ин глава Мягьямед Къурбановдиз тувнийи. Мягьямед Сиражудиновичди улихьна йигъари мициб мярака СиртIич гъулаъра гъабхьиваликан гъапнийи. Хюрккариз бицIидарин майдан мубарак апIбахъди сабси, дугъу гъюру йисан мушваъ мектебдин цIийи тикилиш тикмиш апIбан ляхнар ккергъуз ккайиваликан шадвалин мялуматра тувнийи.
Тебрикнан гафар апIури; мяракайиъ гьацира РД-йин Главайин ва Правительствойин администрацияйин руководителин заместитель Нюсрет Уьмаровра удучIвну гъулхнийи.
Хъасин бицIидарин майдан ачмиш апIбан серенжем кIули гъубшнийи. Лента гьадабтIуз Нюсрет Уьмаровдиз, РД-йин Халкьдин Собраниейин комитетдин председатель Алавудин Мирзабалаевдиз, РД-йин сагъламвал уьбхбан министр Жамалудин Гьяжиибрагьимовдиз, Хюрикк гъулан агъсакъал Аьлимирза Гьясановдиз ва «Табасаран район» МР-ин глава Мягьямед Къурбановдиз табшурмиш гъапIнийи.
Му шаду серенжемдин кьяляхъ гьюрматлу хялар Хючназ хътакнийи, хъа Хюрикк гъулан бицIидар чпи бадали тикмиш дапIнайи майдандикан мянфяаьт ктабгъуз хъюгънийи. БицIидарин шаду сесери майдан гурлуди чIиви гъапIнийи.
