Аьлибегова (Гьясянбегова) Казибат Табасаран райондин Вечрикк гъулаъ бабкан гъахьну. Курккарин кьялан мектебдиъ 9-пи класс ккудубкIну, дугъу Дербент шагьрин медицинайин колледждиъ урхуз хъюгъру. Кьялан пишекарвалин образование гъадабгъу Казибат чан хизандихъди Дербент шагьриъ яшамиш шула. Мектебдиъ урхури гъахьи вахтарихъан мина багъри чIалнахьна, поэзияйихьна маракьлувалиинди илтIикIури гъахьи жигьил шуру шиърар дикIуз хъюгъру. Дугъан «Кьюрдунна хьадукран гьюжат» кIуру шиир улихьна йисари «Табасарандин сес» газатдиъ чап гъапIну. Казибат йиз гъул`ан вушра, узу дугъахъди сабпи ражари Дербент шагьриъ яшамиш шулайи шаирар иштирак шлу серенжемарикан сабдиъ таниш гъахьнийза. Багъри чIал аьгъю, поэзия-йиъ сабпи гамар алдагъуз хъюгънайи шуран шиърар газат урхрудариз кьабул шул кIури, фикир вуйиз.
Багъри гъул
ХярартIин ич кюкйирин хяр
Рябкъюраки халачиси.
Гъилигишра гъи наанди,
Гьиргъри азуз багъри юрдар.
Багъри гъулан гьарсаб циркли
Азук артухъ гьевес капIри.
КIарарик таб багъри гъулан
Рябкъюраки Шагь дагъларси.
ЦIин шидра йиз багъри гъулан
Кайиб ву кIур гьарсаб дарман.
Вичар кIуруш Вечрикк гъулан,
Дицдар сарун дихъур наан?
Гъулан кIулиъ пирин гьари
ТIубччвура кIул, туври салам.
Чинчун гьар`ин гъулан жакьвли
А ккебгъну чан зирек мукьам.
Багъри йиз чIал
Гъарзун чIулсиб
Гафарин дагъ
Вуйи йиз чIал,
Гъубз аьсрариъ
Дархьи мичIал…
Макадабхъан,
Дубхьну кIикIал,
Аьзиз, ширин,
Багъри йиз чIал!
Лигура баб унчIвхъан
Амси йигъ ву, лигури а баб унчIвхъан,
Саб фтикан-вуш гъалаб кайирси чан кIвак.
Рякъюраки ламун улар`ан дугъан
Наан-вуш ккахънайиб фикрарин шилнакк.
«Гьаз ава баб, гъи мици кур пашманди?
Гьаз сикинсузвал абхъна зяиф жандиъ?» —
Гъапиза гафар бабаз суал вуди,
Гъузнушра суалназ жаваб адарди.
Дийигъна баб уламдикк ккаъну рякъяр,
Гьаз-вуш ерхьурадар дугъаз гафар йиз.
Му арайиъ гъарабху цIару къяркъяр,
Баб уягъ гъаши, гъафиганси фикриз.
«Якьин ву, гъюру», – сес утIубчIву бабан,
«Фу гъабши баб?» – варкI гъапIнийиз сабпну кIваз…
«Хялар гъюру, ккудубкI ухди, кьан мапIан,
ЦIа артухъ апIин ихь хулаъра пичран».
Гъубшну сяаьт, кьюб, шубуб ва юкьубра,
Адар гъафир, шула магьа хябяхъра.
Амма, гьаз-вуш, баб шуладар гьич сикин,
Дийигъна, уьбхюри унчIв айвандин.
Я жан Аллагь
Я жан Аллагь, уву учуз сабур тув,
КIван фикрари фагьум кьалу дапIнайган.
Я жан Аллагь, уву учуз кюмек тув,
Уьмрин ярквраъ рякъ дибрихъри ургнайган.
Я жан Аллагь, учуз ижми иман тув,
Аьсси духьну, кьиблайизди илтIикIган.
Я жан Аллагь, аьсси лукIраз фикир тув,
Убцру ифди кIван гъирагъар дуржнайган.
Я жан Аллагь, артухъ учуз кьувват тув,
Гьякьсузвалихъди женгнаъра айиган.
Я жан Аллагь, дердназ вуйи дарман тув,
Чюлиъ штухъ кюкюси дахаргнайиган.
КIаму али лаваш
Диф улубчIвнай завуз ухшар дапIну маш,
Икриъ цал`ин деъна бицIи Селминаз.
Дих апIура бабу дугъаз ипIуз аш,
Риш гъюрадар. Деъна цал`ин, туври наз.
– Я жан бабан, гъач ухди, дижибкIну маш,
Кабсну чIур шула яв гъабраъ айи аш.
– Я баб, ккундарзуз му яв дюгдин аш,
Узуз ккундузуз кIаму али лаваш.
Поэзияйин мурччв гьязур гъапIур
Шюшеханум Керимова ву
