Дагъустандин Огни шагьриъ меценатдин («Нафтагаз» АО) пулин дакьатарихъ цIийи аьгъювалар тувру Центр яратмиш апIувалин (роботарин техника ва моделирование) проект хъуркьувалиинди уьмриз кечирмиш гъапIну.
РД-йин Москвайиъ айи вакилвалин идарайин ва Дагъустандин Огни шагьрин администрацияйин главайин заместитель Эльдар Назарялиевдин сатIи вуйи ляхнин натижайиъ, гьацира «Йиз Дагъустан» кIуру кадрйирин резервдин вакиларин кюмекниинди, Дагъ.Огни шагьрин МБОУ-йин 3-пи нумрайин кьялан мектебдиъ 4 йисан аьгъювалар тувбан программайиз тялукь вуди либхру ва цIийи аьгъювалар тувру Центр ачмиш гъапIну. Шадлугънан серенжемдиъ «Дагъустандин Огни шагьур» шагьрин округдин админист-рацияйин главайин заместителар Эльдар Назарялиев ва Фикрет Бабаев, шагьрин администрацияйин аппаратдин кIулиъ айи Агъабег Гьяжиев, шагьрин депутатарин Собраниейин депутатар Мягьямед Гъафаров ва Гъасбула Баркаев иштирак гъахьнийи.
«Ихь шагьриъ цIийи аьгъювалар тувру Центр ачмиш апIбиин гизаф шад вуза, ва «Нафтагаз-Бурение» ООО-йин ухьуз кюмек туву вакилариз аьхю чухсагъул мялум апIуз ккундузуз. Улихьна йисарира дурари ухьуз спортдин мектебариз лазим вуйи алатар масу гъадагъуз кюмекар гъапIнийи.
Гьаму центри ихь бицIидариз деврин образованиейин гъурулушдиъ жара йишвариъ аьгъювалар гъадагъурайидарихъди конкуренцияйиз удучIвуз шлу аьгъювалар тувди», – гъапну Эльдар Назарялиевди.
Серенжемдиз уч духьнайи гьюрматлу хялари урхурайидар ва мялимар центр ачмиш апIбахъди тебрик гъапIну, ва дурариз аьгъювалар гъадагъбаъ, шагьур, республика, уьлке бадали вуйи ляхниъ хъуркьувалар ккун гъапIну.
УдучIвну улхбар кку-дукIбан кьяляхъ, центриъ урхурайи баяр-шубари чпин сабпи хъуркьуваларикан ктибтнийи. Мектебдиъ ачмиш дапIнайи кружокари бицIидарик цIийи технологйир аьгъю апIуз гьевес капIди. ЦIийи аьгъювалар тувру йишв рас апIбан, лазим вуйи техникайихъди тямин апIбан, центриъ лихру мялимариз аьгъювалар тувбан харжар «Нафтагаз» АО-йи чан кIул’ина гъадагъну. Думу акционерарин жямяаьтлугъди шагьриз му жюрейин кюмекар швнуб-саб ражари дапIна.
Административ ва жямяаьтлугъ дакьатар хъуркьувалиинди сатIи апIбан натижайиъ шагьриъ, РД-йин Глава Владимир Васильевдин тешкиллувалин теклифар тамам апIбан ва бицIидариз пулсузди цIийи аьгъюваларикан аьлава образование тувбан бадали, «Гьарсар бицIирин хъуркьувал» ччвур тувнайи федералин проектдин асас пай меценатарин пулин дакьатарихъ уьмриз кечирмиш апIура.
Гьаци вуйиган, бицIи шагьрин бицIидариз роботарин техникайиан ва моделированиейиан сифтейин аьгъювалар пулсузди гъадагъуз мумкинвал дубхьна. Хъа думу жюрейин аьгъювалар гьамусдин девриъ чарасуз лазим вуйивал рябкъюрахьуз.
