Октябрин 10-пи йигъан Мягьячгъалайиъ М. Горькийин ччвурнахъ хъайи Урус драмтеатрин бицIи залиъ Гьюкуматдин табасаран драмайин театри тамашичйириз «Сумчрин гъалабулугъ» пьеса улупбиинди театрин 19-пи фасил ачмиш гъапIнийи. ЦIийи спектакль урус литературайин классикар А. Чеховдин «Шушв ча пувал» ва В. Сологубдин «Назук юкIв айивалиан бала» кIуру пьесйирин бинайиин яратмиш дапIнайиб вуйи.
Труппайин театри му пьеса Калмыкия Республикайин искусствойин лайикьлу ишчи режиссер-постановщик Сергей Бурлаченкойин регьберваликкди ва художник-постановщик Елена Варва-ровайин кюмекниинди дивнайиб вуйи.
Спектакль ккебгъайиз театрин кIулин режиссер Жанбулат Гьябибовди залиъ уч духьнайидариз спектаклин гьякьанаан сакьюдар мялуматар тувнийи ва театри гьамусяаьт гъабхурайи ляхникан, театрин цIийи фаслиъ улупуз ккайи спектакларикан ктибтнийи.
Директор Аьлимурад Аьлимурадовди спектакль «БицIи ватандин культура» федералин проектдин дахилнаъди улупурайиб вуйиваликан гъапнийи ва «Саб вуйи Урусат» партияйиз ва Дагъустандин культурайин Министерствойиз спектакль улупуз туву кюмекназ чухсагъул мялум гъапIнийи. Хъасин кьюб актнакан ибарат вуйи, сумчрин тема тартиб апIурайи пьеса улупнийи.
КьатI’иди пидиза: спектакль заан дережайинуб гъабхьнийи. Узу, залиъ айи имбу тамашичйириси, дидкан аьхю неззет ктабгъунза. Артистариин алабхьнайи палатдилан ккебгъну, дурарин уйнамиш апIбан саягъниинакьан – варибди труппайи репетицйириъ гьарсаб гафнан, гьяракатнан, мимикайин ишарйирин зиин, кьадар адрубкьан ражари текрар апIури гъилихуваликан, гьарсаб жикъи гьядисайиин намуслу зегьмет гъизигуваликан шагьидвал апIурайи.
Артистарихьан – уйнамиш апIурайи заманайин инсанарин хасиятар, гъиллигъар, гафар апIувалин саягъ, кIван гьиссарра, гьятта тамарзу хияларра шикиллуди улупуз удукьнийи. Фунур-вуш сар артистдин устадвал жаради къайд апIувал дюз гъюрдар – гьарури, уйнамиш апIурайи игитрин образдиъ бегьемди учIвну, дугъан кIван сирар ва фикрар заан намуслувалиинди ачмиш гъапIнийи. Тамашичйири театрин артистари улупурайи ихь миллетдин уьмрин шартIариз хас дару аьдатар, инсанарин арайиъ айи рафтар аьхю хъугъ’валиинди кьабул апIурайи.
Гьелбетки, багъри театрин артистари гизафси табасаран халкьдин уьмриан дюшюшар улупури вердиш духьнайи бязи тамашичйири сягьнайиин кIули гъягъюрайи гьаракатариз чпин хусуси «кьиматарра» туврайи: «Гьаму Машенька, Настенька, Катенька ччвурарин ерина ихь табасаран ччвурар тувнийиш, ужу хьибдийи»; «Мурари улхбаригъ урус чIалниинди вуйи гафар гьаз гъяърайкIан?» ва жарадар. Ухьуз аьгъюси, тамашичйирин искусствойин гъавриъ хьпан дережа, дурарин эстетикайин лигбар театри тербияламиш дапIну ккунду. Умудлу вуза, ихь артистарихьан гьадму вазифара кIулиз адабгъуз хьибди.
Пьесайин зиин гъизигу зегьметназ чухсагъул мялум апIури, багъри театрин коллективдиз цIийи фаслиъра вафалу тамашичйирин гевюл ачухъ апIуз, дурар чпин устадвалиинди рази апIуз сагъ’вал ва хъуркьувалар ккун апIураза. Гъит, ихь театрин тамашичйир йислан-йисаз жигьил ишри!
