Октябрин 4-пи йигъан Дербент райондин администрацияйиъ мялимдин Йигъ къайд гъапIний. Му серенжемдиъ Дербент райондиан вуйи аьхю пай мялимар иштирак гъахьний.

Мялимар пишекарвалин машкврихъди тебрик апIури, Дербент райондин главайин вазифйир тамам апIурайи Фуад Шихиевди гьамци гъапнийи: «Мялимвал – варитIан гьюрматлу ва марцци пише ву. Учву гъи гизаф мянфяаьтлу ляхин гъабхурачва, ихь гележегдин аьгъювалар артмиш апIурачва. Гьаддиз учвуз аьхю чухсагъул мялум апIураза. Ичв пишекарвалин машкварра мубарак ибшри, варидариз ляхниъ хъуркьувалар, жандин сагъ’вал ккун апIураза».

Дугъахъди сабси Дербент райондин депутатарин Собраниейин председатель Мажмутдин Семедовди ва жямяаьтлугъ палатайин вакил Фейтуллагь Фейтуллаевди мялимар пишекарвалин Йигъахъди тебрик гъапIнийи.

Му мяракайиъ сягьнайиина тазади ляхин апIурайи жигьил мялимариз дих гъапIнийи ва дурариз, гележегдиъ чпи апIуз ккимбу ужудар ляхнарикан бикIуз кIури, лишан вуди китабар тувнийи. Хъа аьхюну пай яшлу мялимариз гьюрматнан грамотйир тувнийи.

Мялимдин Йигъаз бахш дапIнайи му серенжем Дербент райондин культурайин Хулан гъуллугъчйири гьязур дапIнайи концертдин программа улупбиинди ккудубкIнийи.