Хив райондин глава Ярмет Ярметовди райондин мектебариз хялижв хьпан ляхин давам апIури ими. Нубатнан ражари думу МО-йин ляхнарин идара апIру Арсен Рамазановра хъади гъунна дерейин Ляхлаарин мектебдиз хялижв гъахьнийи.
Мектебдихъ хъайи йишв-лан, гьяятдилан, классарилан ул илбицбалан кьяляхъ, Ярмет Аьлиметович мялимарин коллективдихъди ва гьацира гъулан активдихъди гюрюшмиш гъахьнийи.
Гьелбетда, гъуларин учIру месэлйирин аьхир айиб дар. Эгер миди вуйи саб хайлин гъулариъ штун, зирзибилин вая рякъюн читинвалар аш, Ляхлаарин гъуландариз мектебдин гьутIурччвнайи цаларикан ва аварийный гьялнаъ айи бицIидарин багъдикан дерди кайи. Дурари райондин главайикан гъулан халачйирин фабрикайин идарйир гьаци вахтназдикьан бицIидарин багъдиз тувуб тIалаб гъапIнийи.
Главайи кьюрд улубкьайиз мектебдин дутIуркIнайи цалар ижми апIбан ляхнар духну ккуниваликан гъапнийи. Багарихьди райондин администрацияйин терефнаан къарар адабгъну, халачйирин фабрикайин идарйир бицIидарин багъдин ихтиярназ тувбан йикьрар гъапIнийи.
