Сентябрин аьхириъ Дербент шагьрин «Нарын-Гъала» стадиондиин Дагъустандин варитIан аьхю сумчир кIули гъубш-нийи. Му серенжемдин тешкилатчи Дербент шагьрин глава Хизри Абакаров вуйи. Му йигъан сумчриъ 16 жюрбежюр миллетарикан вуйи 25 жут жигьилар иштирак гъахьну ва къанундиинди чпин нюкягь тясдикь гъапIну. Мидланра савайи, сумч-рин мяракайиъ 10 382 инсанар иштирак гъахьнийи.
Дидихъди сабси, му сумчриъ Гиннессдин рекордарин Китабдик кау кьюб милли рекордар дивну: сабпи рекорд – жюрбежюр миллетарин варитIан гизаф вакилари иштирак’вал гъапIу сумчир; кьюбпи рекорд – варитIан гизаф хялар айи сумчир. Мидин гьякьнаан Гиннессдин рекордарин Урусатдин Китабдин биначи Алексей Свистуновди Дербент шагьрин глава Хизри Абакаровдиз цIийиди диву рекордарин сертификатар багъиш гъапIнийи.
Дербент шагьрин администрацияйин ва культурайин гъуллугъчйири му мярака аьхю пишекарвалиинди ва тешкиллувалиинди кIули гъубхну.
Мярака ачмиш апIайиз, аьхю сумчрин жигьиларихъди таниш гъахьнийза, ва дурариз, чпин шадлугънан йигъахъди тебрик апIури, саб-кьюб суалра тувнийза. Фирудин Сеидов ва дугъан уьмрин юлдаш Зульмира Каспийск шагьриъ дуланмиш шулайидар ву. Му жигьил ихь Табасаран райондиан, хъа Зульмира – Агъул райондин вакил ву.
«Учу гъийин йигъ’ин фукьан-вушра разиди вуча, ва Хизри Абакаровдиз учуз, жигьилариз мициб разивалин мярака ачмиш апIбаз аьхю чухсагъул пуз ккундучуз. Гьеле мициб мярака ихь инсанарин уьмриъра ва тарихдиъра гъабхьиб дар. Му гьаргандиз ич уьмриъ гъубзру шадлугънан гьядиса гъабхьну. Гележегдиъ ич бицIидаризра му йигъ ужуб нумуналу ляхинси улупидича. Ва учузра, учухъди сабси гъи сатIи шулайи ихь жигьиларизра, ич уьмрарин аьхиримжи йигъазкьан сатIиди гъузувал сар Аллагьдикан ккун апIурча», – къайд гъапIнийи дурари.
Москва шагьриан Дер-бентдиз эвленмиш хьуз дуфнайи Виктор Запольскийди ва Оля Анисимовайи мяракайин гьякьнаан чпин фикрарра ачмиш гъапIнийи: «Дагъустан – чан хялариз аьхю гьюрмат айи ва гизаф пай жюрбежюр миллетарикан ибарат вуйи республика ву. Учу мина аьхю аьшкьниинди ва инсанариз аьхю гьюрмат ади, гъийин ич шаду йигъра гьамрарихъди сатIиди кIули гъабхуз дуфнача. Дагъустан – му гьарган жюрбежюр ужудар гьядисйир шлу ва аьхю, маракьлу тарих хъайи регион ву. Гъи учу мици шадлугъниинди, ашкьниинди кьабул апIбаз, Дербент шагьрин инсанариз чухсагъул пуз ккундучуз. Мина гъюб’ин гизаф рази вуча. Ва гъи му мярака тешкил гъапIу пишекраризра ва гьамци уч’ин рази вуйи, гъи гьамина учу бадали дуфнайи инсанаризра аьхю чухсагъул пуз ккундачуз. Учуз учву гизаф ккундучуз. Виктор ва Оля».
Аьхю сумчриъ эвленмиш гъахьидариз варидиз хизандин саламатвалин лишнар – меълишнар али синйир, меъли шид айи гажнар, жара итIру сурсатар тувнийи. Мярака мина дуфнайи артистарин, жюрбежюр миллетарин театрарин ва гьацира музыкайин мектебарин гъуллугъчйирин кюмекниинди гизаф шадди, маракьлуди кIули гъубхну.
