Улихьнаси республикайин рякъяриъ хатIасузвалин аьгьвалат лап читинуб вуйи. Гьамусяаьт жавабдар касари ва идарйири, рякъяриъ хатIалу дюшюшар ва аварйир цIиб хьпан бадали, жюрбежюр уьлчмйир кьабул апIура. Вушра, гьелелиг натижйир рази апIрударсдар дар. Гьаму месэайин гьякьнаан Дербент райондиъ айи ич мухбир Умгьанат Сулеймановайи Дербент райондин РОВД-йин полицияйин майор ва ОГИБДД-йин отделин начальник Фейрудин Аскеровдихъди сюгьбат гъубхну. Думу жикъиди исихъ чап апIурача.
– Фейрудин Керимович, ОГИБДД-йин гъурулушдиъ лихури яв 5 йис вуяв. Ляхниъ фицдар читинвалар алахьурачвуз?
– Аьхиримжи йисари ихь республикайиъ автомобилар хъайидарин кьадар артухъ шула. Думу агьалйирин яшайишдин дережа за шулайивалин лишнарикан саб ву. Амма, гьяйифки, автомобиларин кьадар за хьувалихъди сабси, рякъяриъ дурари гьяракат апIбан къайдйир чIур апIувалин ва аварйир хьувалин дюшюшарра артухъ духьна. Хъа РД-йин МВД-йин Госавтоинспекцияйин улупбариинди, думу жигьатнаан гьял йислан-йисаз пис хьуз хъюбгъна.
Гьаму вазиятар гьисабназ гъадагъну, Урусатдин МВД-йин жягьтлувалиинди, рякъяриъ хатIасузвалин аьгьвалат ужу апIбан бадали, машинар хъаърайидари рякъюъди гъягъбан къайдйир чIур апIуваларин шикил йивру ва дурар видеойиз адагъру алатар керхуз хъюгъна. Месела, Дербент райондин рякъяриъ ккудубшу йисан уьмуми гьисабниинди 11 авария гъахьнийи. Думу аварйириъ 3 кас гъийихну ва 18 касдиз зийнар гъахьну. Хъа цци 14 аварияйиъ гъийихдар сар каскьан адар, амма 15 касдиз хатIалу зийнар гъахьну. Дагъустан Республикайин МВД-йин Госавтоиспекцияйин улупбариинди, цци республикайин рякъяриъ аварйирин кьадар цIиб дубхьна. Гьадму гьисабнаан, кьибла Дагъустандин рякъяриъ гьяракат апIан гьялра ужуб дережайиъ а, пуз шулу, ва гьаму ляхниъ рякъюъди гъягъбан къайдйир чIур апIрударин шикил ва видео адабгъру алатари гизаф кюмек туврачуз. Журумарихьан кин кади, водителари рякъюъди гъягъювалин гьяракат яваш дапIна.
– Машин хъапIрайидарин тахсиркарвалар фицдар ву, ва дурарин улихьишв фициб къайдайиинди гьадабтIурачва?
– Дербент райондин РОВД-йин ОГИБДД-йии жара гъуллугъарихъди, жямяаьтлугъдихъди сатIиди, гьаму йисандин ккудубшу вахтна транспорт ишлетмиш апIбаъ шлу тахсиркарвалар улхьан йисандин тялукь вахтнатIан цIибди ашкар гъапIну. Рякъяриъ кьадарсуз аьхю гьяракатниинди транспорт хъапIрударин кьадарра цIиб дубхьна.
Улихьна йисари рулихъ деърайи гизаф водителари автотранспортди гьяракат апIбаъ ва пассажирар сагъ-саламатди гъахбаъ чпин жавабдарвал гьисс апIурадайи. Гьамус му терефнаанра хайлин дигиш’валар духьна.
Къайд дапIну ккундуки, гизаф водителари автотранспорт лазим вуйи дережайиъ дебккбаз, думу вахтниинди рас апIбаз цIибтIан фикир тувурдар. ДумутIанра савайи, улихьдиси дарди, гьамус рякъяриъ шофервалин аьгъювалар лап цIибди айи водителар гизаф алахьуру.
Бязи абйир-бабари яшнакк ккуркьну адру ва тялукь аьгъювалар адру баяр-шубаризра автотранспорт ихтибар апIуру. Тялукь документар хьтру водителарра гизаф алахьуру. Дицистар ва жара дюшюшари паш’манвалин натижйирихъна хуру.
Гьаддиз, хъана кIваин апIуразаки, рейсназ удучIвайиз улихьна, автотранспортдин эйсчан улакьдин расвализ, документар къайдайиъ айивализ, жвуван сагъламвализ дилигну ккунду. ДумутIанра савайи, рякъяриъ автотранспортди гьяракат апIбан къайдйир дикъатлуди тамам дапIну ккунду. Рякъяриъ хатIалу дюшюшар дархьувал агьалйириканра асиллу ву. Гьарсар касдиз автотранспорт либхурайи рякълан улдучIвбан къайдйир аьгъяди ва гьарсари дурар тамам апIури ккунду.
Аьхириъ учвуз сагъ’вал ккун апIураза? йиз ккуни дагъустан халкь. ХатIалувалихьанра Аллагьди уьрхричву.
– Чухсагъул. Увузра ляхниъ хъуркьувалар ишри.
