Октябрин 14-пи йигъан, Хив райондин мешебеглугъдин кIулиъ айи Загидин Батманов улихь гьучIвну, Хив райондин мектебарин администрацйирин ва урхурайдарин сатIиди вуйи кюмекниинди мектебарин гьяятариъ, багъариъ гъелемар кивбан акция кIули гъубшнийи.

Урхурайдари гъелемар гьам физкультурайин, ОБЖ-йин, КТНД-йин ва зегьметнан дарсариан мялимарин бирмиш-буйругъниинди кивнийи.

Мектебарин администрацйирин терефнаан гьар классдиз чан йишв улупнийи ва дурарин идара апIурайидариз чпин классара хъади кивнайи мюрхюн, наратдин гьарарин гъелемарихъ вахтниинди маргъар-тIулар хъурсбан, шид тувбан, пейин хъабхьбан ляхнар тамам апIувал, саб гафниинди, гъайгъушнаъ хьувал ккун гъапIнийи.

КIваин апIуз ккундузузки, цIиб улихьна вахтари мектебдиъ урхурайи баяр-шубар, зиихъ кудухнайи дарсариан ясана дарсарин кьяляхъ экскурсияйиз харан чинчар, гъяни чинчар, хифар-вичар уч апIуз гъахуйи. Думу масу тувну гъабхьи пулин дакьатарихь мектебдиз лазим вуйи мургул, бедра, гъадгъар, яна фунуб-вушра лазим вуйи шейъ масу гъадабгъуйи. Хъа гъи дицибра амдар. Гьаддиз гъюрайи наслариз йислан-йисаз гъулан, хулан ляхнарикан гьархрира айихь…

Гъит, ихь мектебариъ урхурайдар йисар-вазарилан гьамци гъирагъдилан киву гъелемаринкьа гъайгъушнаъ ишри!