Улихьна йигъари «Яшамиш хьпан бадали кIваинди гъибтурхьа» проект уьмриз кечирмиш апIбан серенжемарин дахилнаъди Дагъустандиз Кафари Осетияйиан «Бесландин дадйир» РОО-йин вакиларин десте гъафнийи. Хялар республикайин Жямяаьтлугъ палатайин кIулиъ айи Аьбдугьялим Мачаевдихъди, РД-йин милли политикайин ва диндин ляхнарин министрин заместитель Арсен Мягьмудовдихъди, мектебариъ урхурайи баяр-шубарихъди гюрюшмиш гъахьнийи.
Гюрюшнаъ тешкилатдин вакилари 15 йис улихьна Бесландиъ террористари мектеб гъибисган гъахьи гъагъи гьядисйириъ уьмур кур гъабхьи дишагьлийирин кьисматарикан ктибтнийи.
Асас серенжем Мягьячгъалайиъ «Дуствалин хулаъ» кIули гъубшнийи. Душваъ «Яшамиш хьпан бадали кIваинди гъибтурхьа» проектдин дахилнаъди «Бесландин дадйири» тешкил гъапIу выставка, Бесландиъ теракт гъабхьихъан мина 15 йис хьпаз, хъа 1999-пи йисан Дагъустандиин алжагъу вари халкьарин террористар терг гъапIхъан мина 20 йис тамам хьпаз бахш вуди, бицIидарин иштирак’валиинди театрламиш дапIнайи сягьна улупнийи. Залиъ республикайин вузарин студентар, мектебариъ урхурайидар дуснайи. Сягьна Дербент шагьрин бицIидарин яратмишарин Дараматдин «Бахтлу бицIивал» вокалин студияйи гьязур дапIнайи литературайинна музыкайин композиция улупбиинди ачмиш гъапIнийи. БицIидари вягьши боевикари кьялаъ тIаъну дидиснайи баяр-шубарин аьзаб ва суза, Бесландин сабпи мектебдин бицIидар азад апIбан бадали, чпин жанар фида апIуз гьязур вуйи мялимарин суратар улупнийи. Думу гъагъи гьядисайикан сягьна ккудубкIиган, уч духьнайидар, терактариъ гъийихдарин гьюрмат уьбхюри, саб дакьикьайиъ ккебехъну дийигънийи.
Серенжемдиъ удучIвну гъулху РД-йин милли политикайин ва диндин ляхнарин министр Энрик Муслимовди 1999-пи йисан Дагъустандиъ ва 2004-пи йисан Бесландиъ гъахьи гьядисйир кIваин гъапIнийи. «Гъи вари дюн’я инсафсузвалихъди ва терроризмдихъди женгнаъ дубхьну ккунду. Жарарин бала шлуб дар, дердназна хажалатназ миллет ва дин адар», – гъапнийи дугъу.
«2004-пи йисан сентябрин вазлиз учкан сарира жямяаьтлугъ ляхникан гьич фикиркьана апIури гъахьундарча. Учуз аьдати уьмур хъапIуз, веледар уьрхюз ккундийчуз. Хъа кьисматну жара пай тувну. Мицисдар хажалатнан дюшюшар затра текрар духьну ккундарчуз», – къайд гъапIнийи жямяаьтлугъ тешкилатдин председатель Сусана Дудиевайи.
