Гъубшу гьяфтайиъ Хючна гъулаъ яшлу касарин Йигъаз бахш дапIнайи серенжем кIули гъубшну. Думу серенжемдиз Табасаран райондин жюрбежюр гъулариан улихьди жюрбежюр гъуллугъариъ гъилиху 40 яшлу касдиз теклиф дапIнайи. Серенжем сатIиди тешкил гъапIдар ва кIули гъубхдар Табасаран райондин агьалйирин яшайишдин игьтияжар гьуркIрайи Комплексный центр ва Табасаран райондин администрация вуйи. Райондин администрацияйин культурайин, спортдин, туризмдин ва жигьиларин политикайин отделин кIулиъ айи Аьбдулвагьаб Аьбдуловди, шадлугънан серенжем ачмиш апIури, вари дюн’яйин яшлу касарин Йигъ, ООН-дин Генеральный Ассамблеяйин резолюцияйиз асас вуди, 1991-пи йисхъан мина къайд апIурайиваликан, му машкври яшлу касариз дерин гьюрмат апIуз ва баркаллагь пуз мумкинвал туврайиваликан гъапнийи.
Чан удучIвну улхбаъ Табасаран райондин глава Мягьямед Къурбановдира му серенжемдиз уч духьнайи яшлу касар машкврихъди тебрик гъапIнийи ва гьамци гъапнийи: «Му яшлуйирин Йигъ’ин, фагьумлу касарин йигъ кIури, ччвур иливну ккунду. Гъи мушваъ аьхю яш дубхьнайи инсанар уч духьна, дурари чпин вахтна район артмиш апIбак аьхю пай кивну. Учву жигьилариз ужуб рякъ улупурайи инсанар, нумуналу касар вучва. Ичв гьарсар касдин гъубшу уьмур лайикьлуб вуйичв. Учу ич терефнаан гьарсаб вахтна учвуз фикир тувуз, лазим вуйи кюмек ва гьюрмат апIуз гьязур вуча. Узу учвуз ва ихь райондиъ айи вари яшлу касариз жандин сагъ’вал, хушбахтвал ккун апIураза, ичв багахьлуйир учвуз лигури, гьюрмат апIури, ичв гьарсаб йигъ гьамциб машкврин йигъсиб ибшрийичв».
Яшлу касариз машквар гьацира Табасаран райондин депутатарин Собраниейин председатель Аьлимягьямед Къазиевди, Табасаран райондин агьалйирин яшайишдин игьтияжар гьуркIру Комплексный центрин директор Нариман Аьлиевди, Табасаран райондин прокурор Къафлан Аьлимурадовди, Табасаран райондин яшлуйирин Советдин председатель Талиб Мутелимовди, Табасаран райондин ветеранарин Советдин председатель Зиявудин Ражабовди тебрик гъапIийи ва лап кIваз мани гафар гъапнийи.
Яшлуйирин терефнаан серенжемдиъ Къужник гъул’ан вуйи Рашид Рашидов удучIвну гъулхнийи. Му касди чан вари уьмур, 52 йисан бицIидариз тербия туври, мялимвализ бахш гъапIну. Чан улхбаъ дугъу гьамциб мярака гьязур гъапIу касариз аьхю чухсагъул мялум гъапIну, дугъу гьацира яшлу касариз вуйи саб ужуб мяълира гъапIнийи.
Серенжемдиъ гьацира Хюрикк гъул’ан Мигъанай Гьясанов, Хючна гъулан вакил, РФ-дин лайикьлу мялим Желил Мусаев, МВД-йин лайикьлу ветеран Борис Агъаев, Гурихъ гъулан агьали, 52 йисан мялимди гъилихну Мирза Къурбанов, РФ-дин образованиейин лайикьлу гъуллугъчи Фейтуллагь Буржумов, тракторист-комбайнер Низамудин Гьяжиев ва хайлин жара касар иштирак гъахьну.
