Октябрин 4-пи йигъан Табасаран райондиъ Рибчрайин гъвалахъ хъайи хялар кьабул апIру дараматариъ «Табасаран-2019» кIуру студентарин форумди ляхин ккебгънийи. Форумдиъ удучIвну улхури, Табасаран райондин глава Мягьямед Къурбановди гьамцдар гафар гъапнийи: «Анжагъ саб Табасаран райондиъ 14 йислан 30 йис’инакьан яш айи 16 агъзуртIан артухъ жигьилар а.
Думу аьхю кьадар жигьиларикан хайлиндари ихь республикайин саб жерге заан урхбан идарйириъ урхура, дурарин арайиъ урхбаъ, жямяаьтлугъ уьмриъ заан активвал улупурайидарра гизаф а. Гъийин му серенжемдиз гьацдар тафавутлу шулайи студентарикан 125 касдиз теклиф дапIнача. Форум кIули гъабхбан метлебра жигьилар хъана ужуди аьгъювалар гъадагъуз, жямяаьтлугъ уьмриъ иштирак хьуз гьевесламиш апIувал ву.
Ихь уьлке душмандихьан гъюбхю, думу цIийикIултан ликриин гъапIу ихь аьхю насларин аьдатар лайикьлуди кIули гъахбак, ихь багъри Ватан хъана гюрчег апIбак, ихь республика цIийи алапIбак, республика хъана артмиш апIуз зегьмет зигбак учву пай кивур дупну, умудлу хьуз ккундузуз. Гележегдиъра учвуз урхбаъ, спортдиъ заан хъуркьувалар, уьмриъ хушбахтвалар ишри».
Форумдиз РД-йин жигьиларин ляхнариз лигру министр Камил Сяидов дуфнайи, дугъу чан улхбаъ жигьилар му цIийи форумдихъди тебрик гъапIнийи. Жигьиларин политика кIули гъабхбаъ заан натижйир улупбаз лигну, «Табасаран район» МР-ин глава Мягьямед Къурбановдизра аьхю чухсагъул мялум гъапIнийи. Форум «Жигьил кIакIначйир» ва «Туризмна багъри юрд аьгъю апIувал» кIуру темйириз бахш дапIнайи. Думу меселйирин гьякьнаан студентарихъди Рамис Рамазановди, Марат Рягьимовди, Рафик Аьлиевди, Аьбдулвагьаб Аьбдуловди ляхин гъапIну.
Форумдин директор Халитдин Къурбановди, серенжемдин иштиракчйирихьинди илтIикIну, гьамци гъапнийи: – «Ухьу ихь проектар Дагъустан Республикайин ва Урусатдин гьюкуматдин улихь дюрхну ккунду, грантариъ ва конкурсариъ гъалиб духьну ккунду». Хъасин форум ачмиш гъапIнийи. Серенжемдиъ милли эстрадайин артистари жикъи концертдин программара улупнийи.
Форум абццбалан кьяляхъ, Табасаран райондин глава Мягьямед Къурбанов ва РД-йин жигьиларин ляхнариз лигру министр Камил Сяидов студентарихъди гюрюшмиш гъахьну ва дурарихъди, Табасаран райондиъ туризмдин рякъяр ачухъ дапIну, думу циркил райондиъ чан лазим вуйи къайдайиз хпакан, гьацира студентари чпин кIул’инди ляхин апIуз дубгъбакан сюгьбат гъубхну.
Гьацира студентар Табасаран райондиъ айи туриствалин йишварихъди таниш гъапIнийи. Дурариз ХустIил гъулаъ айи Дюрхъ, Ургур чвуччвун ва сар чуччун гъала, Къужник гъулаъ айи Табиаьтдин гъяд, Хючна гъулаъ айи музей ва гьацдар жара йишвар улупнийи.
7-пи октябриъ Хючна гъулаъ «Табасаран-2019» жигьиларин форум аьхирихъна гъюбахъди аьлакьалу серенжем кIули гъубшну. Душваъ багьалу хяларира иштирак’вал гъапIнийи. Дурарин арайиъ Дагъустан Республикайин Главайин ва Правительствойин Администрацияйин руководителин заместитель Нюсрет Уьмаров, республикайин юстицияйин министр Къазимягьямед Сефикъурбанов ва жарадар айи.
Форум ккудубкIру йигъан Табасаран райондин глава Мягьямед Къурбановди форумдин тешкилатчйириз ва кураторариз баркаллагь мялум апIбан гьюрматнан грамотйир тувнийи.
