Хив райондиъ мялимдин Йигъ къаршуламиш апIури, райондин мектебариъ му йигъаз тялукь планар дюзмиш дапIну, аьхю серенжемар кIули гъушну.
Гьацдар аьхю серенжемарикан саб райондин культурайин хулаъ гъабхьнийи. Мярака абццри ва дина дуфнайи мялимариз, аьлимариз, директорариз, дурарин заместителариз, бицIидарин багъарин заведующйириз хушгелди апIури, сифтейин гаф райондин глава Ярмет Ярметовди гъапнийи.
«Ригъ адарш, кюкйир даршул, гьава ужуб дарш, шид бегьем дархьиш, табиаьтдиъ я чрушин, я чIивишин даршул, хъа мялим адарш, я шаир, я аьлим, саб гафниинди, инсандихьан адмивалин рякъюъ учIвуз даршул ясана адмивалин лишнар кайи кас даршул. Чухсагъул учвуз, учву зигурайи зегьметназ, гьюрматлу мялимар. Гъи вари Урусатдиъ мялимдин Йигъ къайд апIура. Гъит, ичв жандиъ ужуб сагъ`вал, ляхин апIуз иштагь шлуси, хизандиъ мясляаьт, шадвал, ляхниъ ужудар хъуркьувалар ишри. Учву дарс киврайи баяр-шубари чпиз туву аьгъюваларин бурж ктипури, ужуб бегьер тувричвуз! Йиз улхбан аьхирихъна гъюри, А.Некрасовдин гафар кIваин апIуз ккундузуз:
Мялим!
Яв лайикьлу ччвурнан улихь,
ихтияр тув,
кьамкьариинди деуз…
Чухсагъул!», – гъапнийи Ярмет Ярметовди.
Райондин главайин кьяляхъ мялимариз чухсагъул мялум апIбан лайкьлу гафар Хив райондин образование-йин отделин начальник Назаряли Тарлановди гъапнийи.
Cеренжемдиъ лайикьлувалиинди ляхин апIурайи саб жерге халис мялимар лишанлура гъапIну. Дурарин арайиъ мухрик кибтIру, «Дагъустан Республикайин образованиейин отличник» кIуру медалар ЦIинитI гъулан мектебдин мялим Мягьямедзагьир Къазимягьямедовдиз ва Хиварин кьялан мектебдин мялим Анисат Мукаиловайиз тувнийи.
Дагъустан Республикайин ва Хив райондин администрацияйин грамотйириинди, гьюрматнан кагъзариинди лишанлу гъапIнийи мялимар: Шихайиб Ханмягьямадов (Зилдккарин мектеб), Рамазан Велибегов (Цнал гъулан мектеб), Рамазан Рамазанов (Хирижв гъулан мектеб), Бесхалум Аьгьмедова (ГъванцIларин мектеб), Анфиса Гьяжибегова (ЦIийи-Фрюгъярин мектеб), Гьяжимягьямед Нурмягьямедов (Гъвандккарин мектеб), Фарман Назарялиев (ГъуштIларин мектеб), АрхътIарин бицIи классарин мектебдин директор Раимат Шябанова ва Хиварин «Солнышко» яслийин тербиячи Гюльнара Вурдиханована.
Серенжемдин аьхириъ табасаран ва лезги халкьарин кьавлари сягьнайилан мялимдикан вуйи мяълийир гъапIнийи, мектебариъ урхурайидари шиърар гъурхнийи, Хиварин театрин коллективдин иштирак’валиинди гьязур дапIнайи сягьнйир улупнийи. Гъвандккарин Бабаев Рамазанди регьбервал туврайи ялхъвнарин «Асса» кIуру дестейин ва Асккан Ярккарин Гъайинбег Къулиевди гьязур дапIнайи, мектебдиъ урхурайи далдабчйирин иштирак’вал ади концертдин программа кIули гъубшнийи.
