Гъийин макьала Дагъ.Огни шагьрин юкьубпи нумрайин мектебдиъ мялимди лихурайи ва баяр-шубарин ва дурарин абйир-бабарин терефнаан аьхю гьюрмат айи гьевескар Гьязим Асланбеговдикан вуйиз.
Гьязим Асланбегов 1973-пи йисан Гъуярик кIуру гъулаъ бабкан гъахьну. Хизан Дагъ.Огни поселокдиз кюч гъабхьиган, дугъу шагьрин 1-пи нумрайин кьялан мектебдиъ урхуз хъюгъру. 1989-пи йисан 9-пи класс ккудубкIну, думу Дербент шагьриъ айи педагогвалин училищейик урхуз кучIвру. Хъасин дугъу ДГПИ-йин урус чIалнанна табасаран чIалнан факультетдиъра урхуру. Институт ужудар аьгъювалариинди ккудубкIну, жигьил пишекар Гьязим Асланбеговди чан зегьметнан рякъюн садпи гамар Дагъ. Огни шагьрин 4-пи нумрайин мектебдиъ табасаран чIалнан дарсар кивру мялимди лихури алдагъуру. Душваъ думу, жигьил нас-лиз агъювалар ва тербия туври, 1997-пи йисхъан мина гъийин йигъазкьан лихура.
Фунуб ляхни вушра, эгер инсанди думу юкIв хъади тамам апIури гъахьиш, ужудар натижйирра тувру. Учв лихуз хъюгъю йисари Гьязим Асланбегов багахь районарин мектебариъ харижи чIаларин дарсар кивру мялимарин арайиъ кIули гъягъру конкурсариъра иштирак шули гъахьну.
Мектебдин директор Расим Мирзоевди гъапиганси, Гьязим мялим мектебдиъ урхурайидар чав гъабхурайи предметдин лап дикъатлувалиинди гъавриъ тIаувалиинди, гьарсар урхурайирин хасият аьгъю апIувалиинди, гьарсарин кIвахьна вуйи жюлгер агувалиинди тафавутлу шула. Коллективдиъра, жямяаьтлугъдиъра Гьязим мялимдиз аьхю гьюрмат а. Думу инсанвалин, кIван жумартвалин аьхю лишнар айир ву.
Къайд дапIну ккундуки, Гьязим Асланбеговди гъи мялимвалин рякъюн эвелиъ чахь аьгъювалар гъадагъу бицIидарин баяр-шубаризра агъювалар тувра. Гьязим мялимди чахь урхури гъахьидар мектеб ккудубкIбалан кьяляхъра чахьна аьхю гьюрматлувалиинди илтIикIувал жвуван зегьметнан варитIан аьхю хъуркьувалси гьисаб апIура.
Гизаф йисари жигьил наслиз агъювалар ва тербия тувбаъ дугъу гъизигу зегьмет гьюкуматдин терефнаанра лишанлу дарапIди имдар. Дугъаз мектебдин руководствойин, райондин образованиейин управлениейин терефнаан гьюрматнан грамотйир а. Думу сабпи категорияйин квалификация айи мялим ву. Дугъан гизаф пай ученикари, республикайин конкурсариъ иштирак шули, 1-пи, 2-пи, 3-пи йишвар дисура.
Умудлу вуза, жигьил наслиз аьгъювалар ва тербия тувбан ляхниъ Гьязим Асланбеговди хъана аьхю хъуркьувалар гъазанмиш апIиди.
