Швнуд-сад йис мидиз улихьна Санкт-Петербург шагьриъ, Дагъустандин мусурмнарин диндин управлениейин вакил, Санкт-Петербург шагьрин ва Ленинградский областдин ГУВД-йин Жямяаьтлугъ советдин член Исагьяжи Уьсманов кIулиъ ади, региондин «Дагъустан» кIуру культурайинна аьгъювалар тувбан жямяаьтлугъ тешкилат абццнийи.

Думу тешкилатдиз шагьрин Василеостровский райондиъ Приморское метройин багахь юкьуб мертебайин успагьи дараматра тикмиш гъапIнийи (шиклиъ). Му дараматдиъ дарсар кивру классар, кинотеатр, бицIидари тамшир апIру хал, библиотека, китабар урхру зал а, хъа сабпи мертебайиъ 500-дихьна инсандихьан сабишв’инди гъудган апIуз шлуганси аьхю мистра ккабалгна.

«Тешкилатдин асас вазифйирикан саб – Санкт-Петербургдиъ айи дагъустанлуйирихъдиси, гьамушваъ яшамиш шулайи агьалйирихъдира диндин, культурайин ва жара цирклариан аьгъю-валар тувбан ляхин гъабхувал ву. Думу ляхин ихь республикайин гьякьнаан вуйи фикир ужуб терефназди дигиш, инсанарин арайиъ айи дуствалин аьлакьйир мюгькам апIуз диш дапIна. Учу гъабхурайи ляхнин программайиъ Урусатдин варитIан гизаф миллетар сабишв’ин сатIиди албагну яшамиш шулайи Дагъустандин тарих, культура, аьдатар, гирами Кьур’ан, ислам диндин къанунар, аьраб, урус, инглис ва дагъус-тандин халкьарин милли чIалар аьгъю апIувал улупна. Агьалйириз гьаму дарсар пулсузди туврача», – гъапнийи Исагьяжи Уьсмановди.

«Гьар – йимишариинди, хъа инсан – зегьметнан хъуркьувалариинди машгьур шулу», – дупна халкьдин айтуйиъ. Му тешкилат гьяракатнаъ айи йисари гьамушван вакилари хайлин баркаллу ляхнар, рягьимлувалин серенжемар кIули гъухну. Инсанар дурарихъ хъугъну, фицики йислан-йисаз жямяаьтлугъ тешкилатдиз гъюрайи ватандашарин кьадар артухъ шула. Исагьяжи Уьсмановди му чпин варитIан аьхю хъуркьувалси гьисаб апIура.

Тешкилатдиъ аьраб, авар ва лезги чIалар киври кьюдпи йис ву. Гъябгъюрайи урхбан цIийи йис ккебгъхъан мина мушваъ табасаран чIалра кивра. Думу дарсарикан, бицIидарин ва абйир-бабарин чIалнахьна вуйи янашмиш’валикан учу жара макьалайиъ хъайи-хъайиганси бикIидича.

«Дагъустан» жямяаьтлугъ тешкилат ачмиш гъапIу йисари Василеостровский райондин хайлин агьалйир, дидиз къаршуди лигури, душваз гъюрайи кавказлуйирихьан гюн адарчуз кIури, тешкилат хъябкьювал ккун апIури, жюрбежюр идарйириз илтIикIури гъахьну. Аьрзачйирин тIалабар гьякьлудар вуш ахтармиш апIури, ерли администрацияйин ва ГУВД-йин вакилар швнуб-сабан дина гъафнийи. Тешкилатдин вакилари аьрз-йир дикIурайидариз чпи гъахурайи серенжемариъ, рягьимлувалин акцйириъ иштирак хьуз теклиф гъапIну. Гъи жямяаьтлугъ тешкилатдин волонтерарин арайиъ гьадму саб вахтна дидиз къаршуди удучIвнайидарра рякъюру. Дугъриданра, уьмрин гъагъи аьгьвалатнаъ ахъу вая гъагъи уьзриан сагъ апIуз пулин кьувват адру хайлин хизанариз му тешкилатди кюмек гъапIну ва апIура.