Октябрин 15-пи йигъан Табасаран райондин поселенйирин арайиъ айи культурайинна азад вахт адапIру центриъ райондин активдин яркьу собрание кIули гъубшну. Дидиъ гьял апIуз адабгънайи месела «Табасаран райондин 90 йис тамам хьпаз бахш дапIнайи серенжемарин натижйирин гьякьнаан» вуйи.

Собраниейин иштиракчйирин улихь райондин глава Мягьямед Къурбанов удучIвну гъулхнийи. Дугъу къайд гъапIганси, юбилейин серенжемариъ 20 агъзуртIан артухъ инсанар иштирак гъахьну. Думу йигъан анжагъ райцентриъ саки 8 агъзур автомобиль айи. «Райондин улихь-кIулихь гъахьи гьюрматлу касарин гафариинди, мициб аьхю кьадар иштиракчйир айи мярака гьамусдиз райондин тарихдиъ гъабхьиб дар. Думу серенжемар кIули гъахуз саки 12 миллион манат харж гъабхьну. Дидкан анжагъ 1 миллионна 800 агъзур манат бюджетдин пул вуйи. Хъа имбуну дакьатар спонсорарин кюмекниинди уч гъапIдар ву», – гъапнийи райондин кIулиъ айири.

Мягьямед Къурбановди аьхиримжи вахтна райондиъ образованиейин, сагъламвал уьбхбан цирклариз эгьемиятлу фикир туврайиваликан ктибтнийи. Дугъан улхбаан асас вуди рякъяр тикмиш апIбан ва агьалйир штухъди тямин апIбан ляхнариз бахш вуйи гафари собраниейин иштиракчйир шад гъапIнийи. Главайи туву мялуматариинди, цци, уьмуми гьисабниинди, саки 50 км рякъ`ин асфальт улубзну, йисан аьхириз 23 км манзилнаъди шид зигру турбйир ккивбан ляхнар тамам дапIну ккудукIиди.

Табасаран райондин администрацияйин ляхнариин идара апIурайи Аьбдурягьим Аьбдулжелиловди юбилейихьна гьязур хьпаъ ва думу кIули гъабхбаъ чпи лихурайи йишвариъ тафавутлу гъахьи агьалйир лишанлу апIбан гьякьнаан вуйи Табасаран райондин главайин къарарар гъурхнийи ва дурариз тялукь пешкешар ва гьюрматнан грамотйир тувнийи.

Собраниейиз уч духьнайидариз райондин поселенйирин арайиъ айи азад вахт адапIру центрин культурайин гъуллугъчйири гьязур дапIнайи маракьлу концертра улупнийи.