Рякъ рас гъапIу, гъяд диву, булагъ гъийибтIу инсанар халкьдин кIваълан гьархрайиб дар, ва дурариз гьарган чухсагъул кIурайиб ву.
Цци 21-пи сентябри узузна Мухтар Байрамбеговдиз Табасаран райондин 95 йисандин юбилейиъ иштирак хьуз кьисмат гъабхьунчуз. Учу Ляхла гъул’антина гъягъюз мясляаьт гъапIнийча. Ляхлаан Табасаран райондин Гуми гъулазкьан гъягъюз рякъ читинуб вуйиб узуз бицIи вахтнахъанмина аьгъяйзуз. Думу рякъ рас гъапIхъанмина дилин душнадайза.
Магьа гъи узуз, фици хайлин манзилнаъ Рубас ниризкьан гъарзун чIул утIубчну, рякъ яркьу гъапIнуш ва хяхял алабхьну, думу Гуми гъулазкьан къайдайиккна дубхнаш рябкъюразуз. Жямяаьтдин улихь гьучIвну му ляхин кIулиз адабгъурикан ктибтуб ужуб ляхин вуди гьисаб апIураза. Думу кас Ляхла гъулан культурайин хулан директор Маллаев Фирудин Керимович ву.
Хъа эвелиан му хайирлу ляхниз яракар гъахьир Маллаеварин язна, хусуси метлеб айи дявдин операцияйин иштиракчи Владислав Леонов вуйи. Дугъу сач хьадукран вазари чан уьмрин юлдшин гъуландариз, волейболин турнир гъабхуз, чан терефнаан 50 агъзур манат тувнийи. Амма, гьавйир амсишнариин алахьну, думуган талитар кIули гъахуз гъабхьундайи. Турнир жара вахтна вушра гъабхурхьа дупну, Владиславди пул рякъюз харж апIуз ният гъапIнийи.
Му хайирлу ляхниз сифте Маллаеварин багахьлуйири, хъасин гъуландари, Табасаран ва Хив районарин гъуларин агьалйири, ярхла терефариъ яшамиш шулайи инсанарира пулин кюмек гъапIну. Фирудиндин гьисабариинди, 273 касди пул хътапIнийи. Гьадрарин арайиъди хусуси метлеб айи дявдин операцияйин иштиракчйир вуйи РД-йин Главайин насигьятчи Замир Гьяжимурадов (Ккувигъ гъул), РД-йин Халкьдин Собраниейин депутат Расим Гьяжиагъаев, (Ургъа гъул), Низами Изилов (Ляхля гъул) ва гизаф жарадар улупуз шулу. Ляхла гъул’ан вуйи ва гьамусяаьт Къизляр шагьриъ яшамиш шулайи Мягьямед Гьяжимурадов, чан хусуси техника хьади дуфну, рякъ’ин гъилихну, ва дугъу пулинра кюмек гъапIну. Му цIарнаъди чан техника хьади дуфну, гъарзун чIулар утIурчу Ругуж гъулан агьали Расул ва жара техника хьади гъафи хъана гизаф инсанар улупуз шулу.
Фирудин кIулиъ ади, му ляхниз кюмек гъапIдариз зурба вуйи чухсагъул кIурахьа. Миж киврахьа ва тIалабра апIурахьа Хив ва Табасаран районарин улихь хьайидариканра Гуми гъулазди гъягъруган Рубас нириъ гъяд иливуб. Гьаму ляхин ккебгъиш, Хив ва Табасаран районарин агьалйирира кюмек апIур кIури, умудлу вуза, хъа узу гъи вушра думу ляхниз кюмек апIуз гьязурди вуза .
Гъурна дерейиан Мамедгъа-лайиз саб сяаьтнан арайиъ хъуркьрайиб ву. Ужуб рякъюз лигну Гуми гъул’ан Хючназ саб бицIи манзилнаъ хъуркьунчу. Юбилейдин мярака Ургур чвуччвун ва сар чучун гъалайиин гъябгъюрайи. Мушваъ жвуван багахьлуйирихъди ва таниш вуйи инсанарихъди гюрюшмиш гъахьунча.
Му юбилейин мяракайиъ Мягьячгъала, Дербент, Огни шагьрариан, гъунши районариан, авар, гъумугъ ва лак районариан чпин фольклорный нумрйирра хьади артистар иштирак гъахьнийи. Гьарсаб гъулан администрацияйира, чпин майднар гьязур дапIну, хялар кьабул гъапIнийи.
Серенжемдин кьяляхъ учухьна Табасаран райондин главади гъилиху Аьлимирза Гьясанов ва Хив ва Табасаран районариъ прокурорди гъилиху Алимягьямед Гьялимов дуфну, учву ич хялар вучва ва учу наана гъяраш, учвура гьадина гъюрачва, гъапнийи.
Дуфну айи вари хялар жавабдар касари Рубас нирихъ дивнайи «Кавказ» зализ хъади гъушнийи. Хялар лап ужийи кьабул гъапIнийи. Райондин кIулиъ айи Мягьямед Сиражудинович Къурбановди, гьарсаб столихъ дусну айи хяларихьна гъюри, дурарихъди гаф-чIал гъапIнийи. Му ляхин дугъан заанвалси, фурс кадрувалси гьисаб апIураза. Дуфну айи хялариз «Табасаран: накь ва гъи» китаб ва жара пешкешарра тувнийи.
Узуз гъеерхьу гафариинди, Табасаран райондин агьалйирра Мягьямед Къурбановдикан гизаф разиди ву. Узу йиз терефнаан му касдиз чухсагъул кIураза. Жандин сагъвал ади, ляхниъ хъана аьхю хъуркьувалар ишри чаз. Табасаран райондин агьалйиризра сагъвал ва шадвал ккун апIураза.
Г.М. Гюлечов,
Хив район, Хиварин гъул
