Октябрин вазлин 18-пи йигъан Табасаран райондин  культурайин Хулаъ райондин 90 йис тамам хьпан юбилей къайд апIру йигъан  чпин хушниинди жюрбежюр ляхнар тамам апIури гъахьи живанариз чухсагъул  мялум апIбан серенжем  гъабхьну. Къайд дапIну ккундуки, дурари  юбилейин йигъинжагъдиъ къайда уьбхбан, лазим гъабхьи йишвахь яшлуйириз кюмек тувбан ва жара ляхнар тярифназ лайикьлуди тамам гъапIнийи.

Йигъинжагъ жикъи улхбиинди «Табасаран район» МР-ин культурайин, спортдин, туриствал ва жигьиларин политикайин отделин начальник Аьбдулвагьаб Аьбдуловди ачмиш гъапIнийи.

Хъасин удучIвну улхуз гаф «Табасаран район» МР-ин главайин заместитель Заур Мусаевдиз тувнийи. Дугъу къайд гъапIганси, райондин 90 йис тамам хьпан юбилейиз бахш дапIнайи серенжемар тешкиллувалиинди кIулиз адагъбак волонтерари киву пай гизаф аьхюб гъабхьну, дурариз аьхю чухсагъул дарпиди гъитуз шулдар.

Уч духьнайи живанариз чухсагъулин гафар кIури, дурарин тяриф апIури, душваъ гьацира «Табасаран район» МР – ин Жигьиларин центрин директор Рамис Рамазановра удучIвну гъулхнийи. Дугъу саб жерге волонтерариз Жигьиларин центрин терефнаан чухсагъул мялум апIбан кагъзар тувнийи.

Хъасин серенжемдиз уч духьнайидариз райцентрин культурайин Хулан художествойин самодеятельностдин коллективди гьязур гъапIу маракьлу концерт улупнийи.