1995-пи йислан башламиш дапIну, Урусатдин Федерацияйиъ гьар йисан октябрин 25-пи йигъан Урусатдин Федерацияйин таможняйин гъуллугъчийин Йигъ къайд апIури шулу. Урусатдин Федералин таможняйин гъуллугъну уьлкейин экономикайин хатIасузвал, милли маракьар уьрхбак лайикьлу пай кивра.
Таможняйин гъуллугъ уьлкейин чIатан ариш-вериш апIбан ляхнин къайда уьбхру, бюджет гъазанжарихьди абцIру идара ву. Саб гафниинди, таможняйин гъуллугъчйири, уьлкейиз хуз ва уьлкейиан жара йишваз гъабхуз ихтияр адру сурсатар, шей’ар сяргьятарилан дееетбан гъаразнаъ ади, важиблу ляхин кIули гъабхура.
Таможняйин гъуллугъчйирин пишекарвалин йигъ къайд апIбахъди аьлакьалу вуди, гъи «Табасарандин нурар» газатдиъ ихь ватанагьлийикан, Мягьярамкент райондиъ айи таможняйин постнан начальникдин заместителди лихурайи Мягьямед Ханмягьямедовдикан ктибтуз ккундучуз.
Мягьямед Ханмягьямедов 1966-пи йисан Хив райондин Хив гъулаъ бабкан гъахьну. Хиварин кьялан мектеб ккудубкIиган, думу Дагъустандин гьюкуматдин гъулан мяишатдин институтдик урхуз кучIвнийи. Институтдиъ урхури имиди думу Советарин Армияйиъ гъуллугъ апIузра гъушну. Ватандин улихь гирами буржи лайикьлуди тамам дапIну кьяляхъ гъафи жигьили институтдиъ чан урхуб давам гъапIнийи. Мягьямед Ханмягьямедовди, институт уьру дипломдиинди ккудубкIну, экономист-бухгалтерин пише гъадабгъуру.
Чан зегьметнан рякъ дугъу 1990-пи йисан Мягьячгъалайин никкдин сурсатарин заводдиъ бухгалтерди лихбалан ккебгънийи. Кьюд йислан Мягьямед Ханмягьямедов РД-йин гьюкуматдин хусусиятнан Министерствойиъ бухгалтерди лихуз хъюгъну, хъасин сабпи дережайин пишекарди, аьхюну пишекарди лихури гъахьну.
Гьамушваъ лихури амиди дугъу, документар гьязур дапIну, Дагъустандин таможняйиз тувру. Хъа 1995-пи йисан Мягьямед Ханмягьямедов Дагъустандин таможняйин гъуллугъназ ляхниз кьабул апIуру. Уьлкейин экономикайин хатIасузвал уьбхюри, Мягьямед Ханмягьямедов таможняйин ахтармишар гъахру отделин аьхюну инспекторди, таможняйин гъуллугънан ахтармишар гъахбан ляхнарин отделин начальникдин заместитель ктагъбан конкурсдиъ гъалиб духьну, начальникдин заместителдира лихури гъахьну. Хизандихьан ярхла вуди гъуллугъ гъабхуз читинди вуйивализ лигну, думу Мягьячгъалайиз кьяляхъ гъафнийи ва 2009-пи йисан Мягьячгъалайин гьюлиин алвер гъабхру портнаъ лихуз хъюгъну. 2017-пи йисан октябрин вазлизкьан Мягьячгъалайин портнаъ, гьюлиинди гъахру сурсатарин хатIасузвал тямин апIури, зегьмет гъизигну.
Гьамусяаьт Мягьямед Ханмягьямедовди Мягьярамкент райондиъ айи таможняйин постнан таможняйин ахтармишар гъахру отделин начальникдин заместителин вазифйир тамам апIура. Дугъан гъуллугънан буржи – отделин ляхин ккабалгувал, ляхин лайикьлуди кIулиз адабгъбиин гюзчивал гъабхувал, уьлкейин экономикайиз зарар хьуз гъидритувал ву.
Таможняйин гъуллугъчйирин ляхин гъагъиб ву. Дурари гьар йигъан къадагъа дапIнайи сурсатар (наркотикар, спирт, тембеку ва гь.ж., уьлкейин аьтрафарилан мина къанунсузди хувалихъди аькси женг гъабхура. Ич сюгьбатнаъ Мягьямед Сейидуллаевичди таможняйихъди аьлакьа айи ихь ватанагьлийирикан Урусатдин Феде-рацияйин къанун уьбхювал, жара касди туву пакет, сумка хьади сяргьятарилан улдудучIвувал ккун гъапIнийи.
Дугъу гьацира газатдин машнаан тина чав таможняйин идарайиъ лихурайи касар пишекарвалин машкврихъди тебрик апIурайиваликан гъапнийи.
Гьюрматлу Мягьямед Сейидуллаевич, уву ва яв гъарашугъар таможняйин гъуллугъчийин Йигъахъди учура тебрик апIурача. Учвуз ичв жавабдар ляхниъ (учву ихь уьлкейин экономикайин хатIасузвал уьбхбак аьхю пай киврачва) хъуркьувалар ишри. Аллагьу Тяаьлайи учвуз жандин мюгькам сагъ’вал, хушбахтлу уьмур тувричвуз.
