Гъийин девриъ медицинайин кабинет адарди лихурайи мектебарин кьадар йигълан-йигъаз кам шула. Дарсариъ айи вахтна бицIирин кIул, силиб, фун иццру, температура за гъабхьиш, дугъаз сабпи нубатнаъ мектебдин духтри вая медсестрайи кюмек дапIну ккунду. Хъасин дугъу классдин руководителиз иццурайи бицIирикан мялум апIуру.
Мектебдиъ айи медсестрайин вазифйирикан ва ляхникан узуз Табасаран райондин ЧвулатI гъулан кьялан мектебдиъ медицинайин кабинетдиъ лихурайи Мария Гьюсейхановайи ктибтнийи.
Йиз сюгьбатчийин пишекарвалин тажруба 23 йис ву, гьадрарикан аьхиримжи ургуд йисан думу мектебдиъ медсестради лихура. 1996-пи йисан Липецкий областдин Данков шагьрин медицинайин училище ккудубкIну, Мария сад йисан гьадму шагьриъ гъилихну, хъасин багъри гъулаз кьяляхъ гъафну ва ЧвулатI гъулаъ айи медицинайин амбулаторияйиъ фельдшервалин ляхнар тамам апIуз хъюгъну.
«Амбулаторияйиъ ляхин апIбан кьяляхъ, узу ич терефназди вуйи участокдин медсестради дерккнийи. Хъа 2013-пи йислан мина гъийин йигъазкьан гьаму мектебдиъ лихураза. Мектебдиъ лихурайи йисарин арайиъ узуз баяр-шубарик фицибкIа сагъ апIуз даршлу ясана сарихьан сарихьна тарагъуру гъагъи уьзрар кайивалин дюшюшар, баяр-шубар чиб-чпихъди кичIихну, сар-сариз зийнар апIувал гьелелиг алахьундарзуз. Асас вуди узухьна бицIидар, алдакну лик-хил кцIахиган, аьлчIябгъиган илтIикIури шулу. Хъа дарш, жара жюрейин уьзрар узуз мушваъ гьелелиг алахьундариз», – гъапнийи медсестрайи.
«Мектебдиъ абйир-бабарихъди собранйир гъахруган, бицIидарин гьякьнаан, медицинайин терефнаан дурариз тувру кюмекнакан, дапIну ккуни прививкйирикан абйир-бабаризра мялум апIури шулза. Гьелелиг прививкйириз къаршу вуйи гьич саркьан аба-баб алахъундарзуз», – разиди ктибтнийи Мария Гьюсейхановайи.
ЧвултIарин мектебдиъ айи медицинайин кабинет гьаму деврин вари тIалабариз жаваб туврайиб ву. Райондин больницайиан, мектебдиъ медицинайин кабинетдиз йишв ва дициб кабинет гьязур апIуз дакьатар адарш, думу хъябкьюрча гъапиган, Мария Гьюсейхановайи чан хусуси дакьатарихъ кабинет гьязур гъапIну.
«Мектебдин директор Гюляли Ибрагьимовичди медицинайин кабинетдиз йишв тувнийи ва узу дишлади СанПин-дин тIалабариинди кабинет гьязур апIуз хъю-гъюнза. Яв гъавриъ ади, руководствойира кюмек апIруган, ляхин ужуди улихь гъябгъюру. Гьаци, ич мектебдиъра директори, завучари – вариди кюмек тувну, кабинет сатIиди ккабалгунча.
Медицинайин препаратарра гьуркIну ачуз, дурарихъди райондин больницайиан тямин апIурачу. ГьудрубкIруб гъабхьиш, ич мектебдин медицинайин кабинетдиз кюмек апIуз райондин глава Мягьямед Сиражудиновичди гаф тувназуз», – аьлава гъапIнийи мектебдин медсестрайи.
Ич сюгьбатнан аьхириъ Мария Гьюсейхановайи мектебдиъ урхурайи баяр-шубариз, лихурайи мялимариз, вари гъулан агьалйириз мюгькам сагъ’вал ккун гъапIнийи.
