Хив райондин ЦРБ-йин кIулин духтирди лихурайи Жамиля Важибова гьаму йигъари Дагъ.Огнийин аьзарханайин кIулин духтирди дерккну. Дугъаз цIийи гъуллугънаъ сагъ`вал ва хъуркьувалар ккун апIурхьа!
Дугъан ерина вахтназ вуди райондин ЦРБ-йин кIулин духтрин вазифйир Агъамягьямед Нурмягьямедовди тамам апIиди.
Агъамягьямед Нурмягьямедов 1964-пи йисан октябрин 9-пи йигъан Хив райондин Кьуликк гъулаъ зегьметчи Нурмягьямеддин хизандиъ бабкан гъахьну. Багъри гъулан багахь ерлешмиш дубхьнайи Ляхлаарин мектеб ккудубкIбалан кьяляхъ, 1982-пи йисан думу Советарин Армияйиз буржи тамам апIуз гъягъюру ва 1984-пи йисан, армияйин рякъ хъидипну, багъри ругариина гъюру. 1984-1985-пи йисари Мягьячгъала шагьриъ СМУ-йин 8-пи разряддин гъвандин пишекарди лихуру. 1985-1991-пи йисари ДГМИ-йиъ урхуру. Урхбахъди сабси, 1988-1992-пи йисари думу кардиологияйин отделениейиъ, медицинайин тяди хъубкьру кюмекнан объединениейиъ дежурныйди (медбратди) лихуру. 1992-пи йисан Хив райондин ЦРБ-йин ларингологияйин духтирди, хъа 1993-пи йисан 1-пи мартдилан гъябгъюрайи йисан 29-пи октябризкьан, ляхнихъди сабси, ОМР-ин кIулин духтрин заместителди гъилихну. 1985-пи йисан эвленмиш гъахьну. Шубур веледдин адаш ву, чан уьмрин юлдшихъди, хизандихъди Хив яшамиш шула.
Гъит, дугъаз багарихьди ЦРБ-йин кIулин духтир ктагъру конкурсдиъ гъалибвалин йишв кьисмат ибшри!
Аьзарханайиз дуфну имиди, узу салам тувуз, дахънайидарин юкIв цIибкьан алдапIуз, таза хабар-этер тувуз, сакьюдар гафар-чIалар апIуз ва дурари аьзарханайин гъуллугъчйириз фициб кьимат дивраш, дурарихьна вуйи лигувал фици гьисс апIураш, саб гафниинди, аьзарханайин аьгьвалатнакан душваъ дахънайидарихьан мялуматар гъадагъуз кьюб-шубуб палатайизди учIвнийза. Гъачай, дурарин фикрарихъ, ктибтбарихъ хъпехъурхьа:
Бес Байрамова, Асккан-Яракк гъулан агьали, 80 йис: «Валлагьин, жан бай, ич вахтариси дарди, гъи мушваъ гизаф заанди медицинайин кюмек тувра. Гьадмуганра ужудар духтрар айи, амма дурар медицинайин алатарихъ мюгьтаж вуйи, лазим вуйиб адайи. Гъи мушваъ сифте вуйи кюмек тувуз лазим вуйи вари алатар хиликк кка. Йиз, давление за хьпалан гъайри, дици артухъ иццурайиб фукIа адариз, жан бай. Яшназ гъилигиган, фукьан вушра ужу вуза. Мушваъ айи вари гъуллугъчйириз чухсагъул, фукьан вушра лигувал ачуз».
ФатIимат Жалабханова, ГъванцIил гъулан агьали, 71 йис: «ЦIиб улихьна йисариси дарди, гъи ихь Хив райондин аьзархана Москвайиндарихъди тевуз шулу. Ужуб марццишин ва манишин, дих апIайиз ккилилигди гъюри, улукьури, гьерхуб-хъерхуб апIури, лазим вуйи дармнар туври, заан аьгъювалар айи, ужудар пишекар духтрар гъайгъушнаъ айич. Чухсагъул чпиз. Хъана ич, иццурайидарин, гъайгъушнаъ хьуз амур апIри чпиз. Чпин хал-хизандикан, веледарикан юкIв разиди дерккри чпи».
Сеферов Рамазан, Чювекк гъул, 70 йис: «Узура, жан бай, кIулиъ ихь райондин духтрар ади, вари духтрариз йиз терефнаан аьхю вуйи чухсагъул мялум апIураза. Кьяши йиккук ктривруб ва ктруб адар. Хъа думу терг апIуз чарйир агурайи касарин кIваз гъурбан ишри, чпин хизан-кюлфетдин арайиъ шадвал ва сагъ`вал ибшри!»
Мисрихан Мирзалиев, Хив гъул, 30 йис: «Гъи асас вуди герек, сабпи кюмекназ лазим вуйи фунуб-вушра алат, техника ихь райондин бальницайиъ а. ИкибаштIан, дурар больницайиъ хьувал, эгер дурар ишлетмиш апIуз шлу, зигьимлу духтрар адарш, гьунар дар. Пуз ккундузузки, ихь райондин духтрари саб читинвалра адарди дурар ишлетмиш апIура, ва хъана кьувват туври чпиз».
Манатил Назарялиев, Хив гъул, 71 йис: «Йиз заан сахар айивали кми-кмиди бизар апIури азу, жан бай. Узуз, лазим вуйи рубар-дармнариз, капельницйириз гьич саб вахтнара я ваъ гъапи, я маш гъучIубху кас алахъундарзуз. Ихь райондиан, жара йишвариан илтIикIурайи касарин гъайгъушнаъ хьуз, хъана кьувват туври чпиз».
Ав, мурар гьаци гафар бадали дупнайи келимйир дар. Мурар марцци кIваан кIурайи гафар вуйиб анжагъ дурарихъ хъпехъурайи касдихьантIан гьисс апIуз шулдар. Дурари чпин ктитбариан Жамиля Важибовайи гъизигу зегьмет ашкар гъапIну. Ва вахтназ вуди ваъ, хъа ЦРБ-йин кIулин духтирди Агъамягьямед Нурмягьямедович лазим вуйи кас вуйиб субут гъапIну.
Гъит, узу зиихъ кудухнайи ихь ватанагьлийириз аьсрариъкьан духтрар герек даришри. Хъа нагагь лазим гъахьиш, дердназ чарйир агру, адмивалин лишнар кайи касар рякъюъ кьадар-кьисмат ишри чпиз.
Жин апIуб фукIа адар. Гъийин заманайиъ дашбаш гъадабгъури, шли фила жибдихъ фу хътIибшвуйкIан кIури, аьзарлу улихь гьахъну-ккахъну ашкьан кюмек дарапIри, дугъу туврубдиъ ул абхъну, ликар алдагъурайи касар ихь арайиъ цIиб адар. Гъит, дурарин диван сар Аллагьди апIри.
