Дагъустандин жигьиларин ляхнарин Министерствойи ва Кафари Кавказдин исламдин ахтармиш’валар гъахру Центри экстремизмдин ва терроризмдин идеологияйиз къаршу уьмуми программайин сяргьятариъ жигьиларин арайиъ соцсетариъ агитацияйин видеоматериалин презентация гъубхну. Мидин гьякьнаан учуз ЦИИСК-дин директор Руслан Гереевди мялумат тувну.
Дугъан гафариинди гьамусдин жигьилар гьар йигъан экстремизмдин, терроризмдин ва деврин жара къурхулу аьгьвалатарихъди раст шула.
Республикайиъ экстремизмдиз ва терроризмдиз къаршу вуди гъахурайи гьяракатар му жигьил насил къанундиинди тербияламиш апIбан бина ву. Гьаддиз гьаму метлеб ади, яратмиш апIурайи видеоматериалар, жигьилар дурарин гъавриъ хьпан бадали, хъбалгдар ва жикъидар духьну ккунду.
Му месэлйирикан улхури, Руслан Гереевди, методикайин материалар дагъустанлуйирин мургивалин чешнийириин биналамиш шули, гьязур дапIну ккунивал къайд гъапIну.
Мисалназ, жямяаьтлугъди террористарихъди женг гъабхури гъакIи Урусатдин ФСБ-йин капитан Артур Бабаевдикан вуйи фикир даим апIбан проект аьхю разивалиинди кьабул гъапIну.
КIваин апIуз ккундузуз, улупбаз лигну, Урусатдин Президент Владимир Путиндин 2009-пи йисан 16 сентябри удубчIву Указдиинди игитси гъакIи Артур Бабаев Кьягьялвалин ордендиинди лишанлу дапIна.
Мягьячгъалайин «Алеф» чапханайиъ ФСБ-йин капитан Артур Бабаевдин кьисматнакан хроникайин ва биографияйин очеркра адабгъна.
