Гьаму йигъари Табасаран райондин Хючна гъулаъ райондин образованиейин пишекрарин профсоюздин ляхнин натижйир йивбан ва цIийи председатель ктагъбан VIII конференция кIули гъубшну.
Профсоюздин серенжемдиъ Табасаран райондин глава Мягьямед Къурбанов, райондин образованиейин управлениейин начальник Аьбдусалам Гьясанов, профсоюздин рескомдин образованиейин уьмуми месэлйириз лигру отделин начальник Къази Гьясанов, райондин депутатарин Собраниейин председатель Аьлимягьямед Къазиев, профсоюздин сифтейин тешкилатариан 103 делегат ва райондин образованиейин идарйирин кIулиъ айидар иштирак гъахьнийи.
Серенжем ачмиш апIури, Табасаран райондин образованиейин пишекрарин профсоюздин комитетдин председатель Зейфудин Керимовди 2014-пи йисан октябриан 2019-пи йисан октябризкьан профсоюзди гъапIу ляхнин натижйирикан доклад хьади удучIвну гъулхну.
Дугъу чан докладдиъ къайд гъапIганси, гьаму йисарин арайиъ варитIан важиблу месэлйир, дарс кивбан ерийиз ва натижйириз жямяаьтлугъдина пишекрари кьимат тувбан ляхнин механизм дюзелмиш апIувал, педагогвалин пишекрарин цIийи къайдайиинди аттестация гъабхувал, му ляхниина жигьил мялимар жалб апIбан бадали, эдеблувалин къайдйириинди дурарик ляхин апIуз гьевес капIувал ва гьацдар жарадар вуди гъахьну.
Зейфудин Керимовди туву мялуматариинди, гъи Табасаран райондиъ профсоюздин 103 тешкилатди ляхин апIура. Душвариъ 3400 кас а. Мидланра гъайри, райондин профсоюздин председатели, профсоюздин тешкилатари тамам апIурайи ляхникан ва душвариъ гьаму йисарин арайиъ гъахьи дигиш’валариканра гъапнийи.
Гъябгъюрайи конференцияйин дахилнаъди вари 103 профсоюздин тешкилатариъ кIули гъуху собранйирин натижйириинди аьхюнубсиб пай тешкилатарин кIулиъ айи председателар хъанара цIийикIултIан таза муддатназ ктагъуз рази гъахьну.
Хъасин гъябгъюрайи конференцияйиъ мина уч духьнайи профсоюздин вакилари, чпин сесер тувбиинди, гьамусдиз райондин профсоюздин комитетдин председателди лихурайи Зейфудин Керимов хъанара цIийи вахтназ райондин профсоюздин председателди ктагъну ва гьацира душваъ Табасаран райондин профсоюздин тешкилатдин цIийи составра дюзмиш гъапIну.
Профсоюздин цIийиди ктагъу председателиз гъуллугъ тебрик апIури, Мягьямед Къурбановди гъапиганси, профсоюздин тешкилатари чпин ляхин мектебарихъди сигъ аьлакьайиъ ади дубхну ккунду. Гьаци лихури гъабхьиш, профсоюздин тешкилатарин ляхнин натижйирра, хъуркьуваларра ужудар хьиди. Гьаддиз, му тешкилатарин ляхин улихь гъябгъбан бадали, душваз жигьил пишекрар жалб апIури, ляхин гьевеслуди кIули гъабхури ккунду.
