Улихьна йигъари ич мухбир Ражаб Нуров Урусатдин МВД-йин Табасаран райондиъ айи ОМВД-йин ГИБДД-йин начальник, полицияйин майор Рамис Умалатовдихъди гюрюшмиш гъахьну ва Табасаран райондиъ айи отдели цци 10 вазлин арайиъ гъапIу ляхникан сюгьбат гъубхну.
Сюгьбатнаъ Рамис Мягья-медсатиевичди мялум гъапIганси, 2019-пи йисан 10 вазлин арайиъ Табасаран райондин рякъяриъ 7 хатIалу дюшюш гъахьну, дурариъ 1 кас гъакIну, хъа 10 касдиз гъагъи зийнар гъапIну. Му улупбар 2018-пи йисандин гьаму вахтнан улупбарихь тевиш, думуган райондин рякъяриъ 6 хатIалу дюшюш гъахьнийи, дурариъ гъийихдар адар, хъа 15 касдиз гъагъи зийнар гъапIну.
«Рякъяриъ гьяракат апIруган хатIалу дюшюшар дархьбан бадали, газатариъ, интернетдиъ ва жара сайтариъ агитацияйин саб хайлин ляхин гъабхурача. Урусатдин МВД-йин Табасаран райондиъ айи ОМВД-йин ГИБДД-йин отдели газатариъ 1 макьала ва 1 агьалйирихьна илтIикIувал чап гъапIну, «Инстаграмдиъ» 10 материал тувну. Рякъяриъ хатIалу дюшюшар дархьбан бадали, бицIидарихъди ляхин гъабхувал важиблу вуйиб фикриз гъадабгъну, 2019-пи йисан 10 вазлин арайиъ ГИБДД-йин гъуллугъчйири бицIидарин 11 багъдиъ бицIидарихъди серенжемар гъухну. Дидланра савайи, рякъюъди гъягъбан къайдйирин гьякьнаан мектебариъ урхурайидарихъди (8), аьлава образование гъадабгъурайидарихъди (6), автомобиларин карханйирин шофёрарихъди (8), пассажирар гъахру водителарихъди (4) сюгьбатар гъухну. Табасаран чIалниинди удучIвурайи газатарик 3 макьала чап гъапIунча», – къайд гъапIнийи Рамис Мягьямедсатиевичди.
Майорин гафариинди, цци Табасаран райондиъ рякъюъ дизигнайи цIар, Хючна гъулаъ 2-пи нумрайин мектебдихъ инсанар рякълан улдучIвру йишв цIийи алаъну. ИчIар айи йишвар иркбан бадали, УДС-дихъди ляхин гъабхура. Рякъярихъ 35 лишан дивуз Табасаран райондин главайиз кагъаз дибикIна. Гьамусяаьт Табасаран райондиъ бицIидар гъахру 8 автобус а, дурарикан 4 гьарган лихурайидар ву.
Жарадарин машинар хьади гьедрергбан ва икI дарапIбан бадали, райондин ГИБДД-йин гъуллугъчйири гьар вазли машинар рас апIру йишвар, машинар икI апIру касари хъаърайи машинар, гьацира жара шаклу йишвар ахтармиш апIури шулу. 2019-пи йисан 10 вазлин арайиъ машинар рас апIру 19 йишв, машинар дерккру 46 гараж ахтармиш гъапIну. 2019-пи йисан 10 вазлин арайиъ РФ-дин МВД-йин Табасаран райондиъ айи отделин ГИБДД-йиъ лихурайи гъуллугъчйири «Перехват» кIуру пландиинди вуйи 8 тренировка гъухну.
«Ццийин ккудубшу вахт на Табасаран райондиъ айи ГИБДД-йин отделениейи, рякъяриъ автотранспортди гьяракат апIбахъди аьлакьалу хатIалу дюшюшар дархьбан ва административ ихтиярар чIур апIбан дюшюшар хьуз гъидритбан бадали, хайлин ляхин гъубхну. Амма, гьаци вушра, саки гьар йигъан рякъюъди гъягъбан къайдйир чIур апIбан дюшюшар ашкар шула. Дицисдар дюшюшарин арайиъ асас йишв хатIасузвалин чIулар алдарди машинар хъаували, ОСАГО-йин тIалабар тамам дарапIрайивали, автомобиларин шюшйир мучIу апIурайивали ва жара дюшюшари бисура. Къайд дапIну ккундуки, ихь уьлкейиъ ички дубхъну рулихъ деънайидариз вуйи жаза бицIиб дар. Хъа машин хъапIрайир дициб гьялнаъ ади, дугъкан тахсирра ктубчIвиш, жаза хъана аьхюб ву. Гьаци вушра, гьелелиг ички дубхъну рулихъ деъру касар гъузна. Ццийин йисан ккудубшу вахтна дицисдар 3 кас ашкар гъапIну, хъа 14 касди ички дубхънайивалин гьякьнаан ахтармишар гъахбаккан кIул ккадабгъну. Дурарихьна къанундиъ улупнайи уьлчм-йир кьабул гъапIну.
Йисандин ккудубшу вахтна райондин ОМВД-йин ГИБДД-йин отделениейин гъуллугъчйир республикайиъ кIули гъахури гъахьи гьяракатнанна профилактикайин вари серенжемариъ иштирак гъахьну, гьадму гьисабнаан «Ички дубхъну машин хъапIрайир», «ХатIасузвалин чIулар», «Тонировка», «БицIидарин кресло», «Маршрутка», «Шилди гъягъюрайир, мугъаят йихь», «Гьюкуматдин кучIлин номерар» ва гьацдар жарадар улупуз шулу. Хъа 20-пи майдиан 11-пи июндиз, урхурайидари мектебар ккудукIбахъди, дурар мина-тина гъягъювал артухъ хьувалихъди аьлакьалу вуди, «Фикир тувай – бицIидар!» операция, 21-пи октябриан 30-пи октябриз «Маршрутка» операцияйин 3-пи этап кIули гъухну», – аьлава гъапIнийи Рамис Умалатовди.
