Гьюрматлу ватанагьлийир!

Гъябгъюрайи йисан октябрин 25-дилан ноябрин 25-диз «Хив райондиъ варитIан уткан, такабур тарихнан йишв» кIуру конкурс кIули гъябгъюра. РД-йин культурайин министерствойихъди мясляаьт дапIну ва тялукь къарар адабгъну, конкурс тешкил гъапIдар райондин администрация ва думу тешкил апIбан кIулиъ айи Хив райондин культурайин, спортдин, жигьиларин политикайин ва туризмдин отделин начальник Казбек Къазиев ву.

 

Конкурсдин асас метлеб – Хив райондиъ туризм артмиш апIувал, туриствалин маршрут хъипувал, хялар кьабул апIру хулар-йишвар тикмиш апIувал, социалин сетариъ туриствалин цIийи аккаунт ачмиш апIувал, гъуларин тарихнакан ктибтру касар гьязур апIувал ва райондин агьалйир цIийи лихбан йи-шварихъди тямин апIувал ву.

Казбек Къазиевдин гафариинди, конкурсдиъ иштирак гъахьи касариз гьюрматнан кагъзар тувди. Хъа конкурсдин гъалибчйириз: 1-пи йишваз – диплом, 2000 манат; 2-пи йишваз – грамота, 1500 манат; 3-пи йишваз – грамота, 1000 манат тувди.

Конкурсдиъ жвуван гъулан табиаьтдин, тарихнан йишварин шиклар йивну ясана, видеоролик дюзмиш дапIну, инстаграмдин К.З. Къазиевдин аккаунтдиз (kaziev_kazbek_zeinudinovich) хътапIубтIан гъайри, саб артухъ фукIара апIуб лазим дар.

Ихь ватанагьлийириз конкурсдиъ иштирак хьуз дих апIураза. Варидариз иштирак хьуз хъуркьувалар ва ужудар сяътар ишри. Гъит, варитIан артухъ зегьмет гъизигу кас конкурсдиъ гъалиб ишри!