Аьхиримжи вахтна, ухьуз рябкъюрайиганси, Дагъустандин баяри спортдин жюрбежюр жюрйириъ заан йишвар гъадагъура. Дурарин арайиъ табасаран баярра айивалиин ухьу гизаф шад ва дамагълу вухьа. Гьацдар дирбаш спортсменарикан сар Эмин Аьбдуризаевра ву.

Гъубшу гьяфтайиъ думу спортдин ММА жюрейиан Италияйиъ кIули гъушу талитариъ вари дюн’яйин чемпион гъахьну. Дагъустандиз гъалибвал хьади гъафи Эминдиз газатдин редакцияйиз пресс-конференцияйиз дих гъапIнийча. Дугъу газатдин журналистарихъди вуйи гюрюшдиъ чан уьмрикан, спортдин талитарикан, чан гъалибваларикан, учв спортдин ММА жюрейихъна фици гъафнуш, гьаддикан ктибтнийи.

«Узуз сюгьбатнан эвелиъ ихь вари табасаран ватандашариз, узхъан юкIв убгурайидариз, йиз терефкрариз чухсагъул пуз ккундузуз. Узу наан талитариъ иштирак шулашра, йиз халкьдин кьувват, узхъан юкIв убгурайивал гьисс апIураза. Хъа думу кьувватну узуз талитариъ артухъ гуж ва зигьим тувру. Ич тухум Хив райондин Заан Яракк гъул’ан ву. Йиз абйир-бабар Каспийск шагьриз кючмиш духьну, хайлин йисар шула. Йиз адаш Гьяжимирза Рашидович Каспийск шагьриъ 1-пи нумрайин мектебдин завучди лихура, дада Султанбиги Садикьовна, аьдати табасаран дишагьлийирси, хулан, хизандин ляхнариин машгъул ву», – ктибтура Эмин Аьбдуризаевди.

Эмин бицIивахтнахъан мина спортдиин машгъул вуйи. Чан яш 12 йис гъабхьиган, думу боксдиан рес-публикайин жюрбежюр талитариъ иштирак хьуз хъюгъну. Хъа 19 йисан яшнаъ айиган, дугъу боксдиан хайлин талитариъ чемпионвалин ччвур гъазанмиш дапIнайи. Думуган Эминдиз панкратиондиан 3 ражари вари дюн’яйин чемпион гъахьи Хив райондин дамагълу спортсмен Маратбег Къалабеговди спортдин ММА жюрейиинра машгъул хьупан ва чахьна тренировкйириз гъюбан теклиф гъапIнийи. Эминдиз му гафар кьабул шулу. Кьюб гьяфта гъябгъяйизра, спортдин ММА жюрейиан Дагъустандин чемпионатдиъ кьюб кчIихуб дурхну, дурариъ Эмин улупнайи вахт ккудубкIайиз гъалиб шулу.

2018-пи йисан ММА-йиан Урусатдин чемпионат Псков шагьриъ кIули гъябгъюрайи. Думуган Эмин Дагъустандин сатIи вуйи командайин дахилнаъди думу талитариз гъушнийи. Гьадушваъра вари шубуб кчIихуб ихь ватанагьлийи саб читинвалра адарди, кчIихуз улупнайи вахт ккудубкIайиз гъурхну.

«Финалин кчIихбаз 7:1 (ургуб ражари гъалиб, сабан – магълуб гъахьи) рекорд айи машгьур спортсмен Богдан Гуськовдихъди удучIвнийза. Ич кчIихбан вахт саб дакьикьайиъкьан давам гъабхьундайи. Узу думу нокаутдиз гьаънийза. Думуган «Урусатдин спортдин мастер» ччвурра тувнийзуз ва Анапайиъ кIули гъябгъру, вари дюн’яйин ММА-йин Кубок бадали вуйи талитариъ иштирак хьуз теклиф гъафнийзуз.

Урусатдин сатIи вуйи командайин дахилнаъди Анапайиз гъушганра, вари талитар улупнайи вахт ккудубкIайиз улихьна дурхну, Кубокдин сагьиб гъахьунза. Гьамусяаьт йиз тренер Бадави Гьясанов ву. Думу менеджерра вуйиз. Дугъу узу пишекарвалин кчIихбарихьна гьязур апIуз ва узуз пишекарвалин кчIихбар тешкил апIуз хъюгъну», − ктибтура спортсменди.

Эминдин пишекарвалин рекорд 4:0 ву.
Гьамусяаьт думу ММА-йин Fight Family Promotion тешкилатдин чIулин сагьиб ву. Эмин ноябрь вазлин аьхириъ думу чIул уьбхбан бадали вуйи талитарихьна гьязур шула.

Италияйиъ гъабхьи вари дюн’яйин чемпионатдикан ктибтури, Эминди гъапиганси, сифте дугъан му талитариъ иштирак хьуз ният адайи. Хъасин чан тренери, Урусатдин сатIи вуйи командайи сабпи йишв гъадабгъну ккунду, 93 килограммдихьна гъагъ айи спортсменарин арайиъ гъягъру талитариъ иштирак хьуз уву гъарах ва лайикьлуди сабпи йишв бис, гъапиган, думу талитарихьна гьязур хьуз хъюгъну. Дугъан гъагънан категорияйиъ харижи уьлкйирин тереф уьбхюрайи 16 спортсмен айи. Сабпи кчIихуб дугъу Италияйин спортсмендихъди кIули гъубхнийи. ИкибаштIан, уч духьнайи вари тамашичйири чпин спортсмендин тереф уьбхюрайи. Эминди фикир апIуру, эгер очкйир гъазанмиш апIуз хъюгъиш, Италияйиъ кIули гъягъюрайи талитариъ судйири гъалибвал гьадму уьлкейин спортсмендиз тувди. Ва, чахъди талитназ удучIву бализ саб мумкинвалра гъидрибтди, кчIихуб нокаутдиинди ккудубкIуру. Гьадму йигъан (2-пи ноябриъ) дугъу кьюбпи кчIихуб Ирландияйиан вуйи спортсмендихъди гъабхуру.

«Аьхиримжи вахтна узуз Ирландияйин спортсмен Конор Макгрегорикан, дугъан терефкрарикан, дурари дагъустанлуйирикан кIурайи гафарикан яман хъял кайзуз. Гьаддиз дурарин спортсмендихъди сацIиб кьаназ кчIихуз ва дугъаз артухъси йивуз ккун гъабхьунзуз. Сабпи раунддин аьхириъ кчIихуб нокаутдиинди ккудубкIунза. Финалин кчIихбар ккергъайиз, йиз адашди, дадайи, вари дустари, багъри гъуландари телефондиан зенгар гъапIнийзуз. Фу чара дапIнура финалиъ гъалиб шулза кIури, кьаст гъапIнийза. Финалин кчIихуб Польша гьюкуматдин спортсмендихъди 20 секундкьан давам гъабхьундайи. Душваъ узуз «Турнирин варитIан дирбаш спортсмен» ччвур тувну», – разиди мялум гъапIнийи Эминди.

Эминдин кчIихбар маракьлудар ву. Дурариз Америкайин спортдин промоушнарин менеджерари фикир тувра.

Эминдиз жюрбежюр талитарихьна гьязур ва иштирак хьуз чан дустар Мягьямедшапи Шапиевди, Аьгьмед Кицаевди, майил-мадатди кюмек апIура. Дугъу чаз кюмек апIурайидариз варидариз чухсагъул мялум гъапIнийи. Ич сюгьбатнан аьхириъ, ватанагьлийирихьна илтIикIури, дугъу жигьилариз сифтена-сифте аьгъювалар гъадагъуз, хъасин спортдиин машгъул хьуз, лазим дару инсанарихьан, гъиллигъарихьан ярхлади гъузуз теклиф гъапIнийи.
Эминдиз гележегдиъра хъана заан хъуркьувалар, хизандиъ хушбахтвал хьувал, саламатвал ккун апIурхьа.