ЧвулатI гъул – Табасарандин аьхю гъуларикан саб ву. Думу ужудар мялимариинди, спортсменариинди, мяълийирин устадариинди, прозаикариинди машгьур ву. Гьарсаб гъулаъ, шагьриъ адлу касар хьувал, дурар тербияламиш гъапIу абйир-бабариканси, дурариз мектебдиъ дарсар киву мялимариканра ва мектебдиканра асиллу ву.
ЦIиб улихьнаси ич редакцияйин журналистариз ЧвулатI гъулан кьялан мектебдин коллективдихъди таниш хьуз мумкинвал гъабхьнийи.
Мектебдиъ айи марццишин, низам-къайда, дидин икриъ учIвубси, рябкъюйи. Мектебдин дегьлиздикк деънайи дишагьлийи, ич ччвурар журналик дидрикIкьан гагьди, учухьди айитIинди гъягъюз гъитундайи. Миди нубатнан ражари мектебдин айитI айи къайдайикан шагьидвал апIурайи. Директорихъди учу ЧвулатI гъулан мектебдиъ мялимди лихурайи, ихь газатдихъди ужудар аьлакьйир уьрхюрайи Алим Гюловди таниш гъапIнийи.
Мектебдин директор Гюляли Жамаловди учуз чав регьбервал туврайи мектебдикан, мялимарин коллективдикан, гъабхурайи урхбанна тербияйин ляхникан хъайи-хъайиганси ктибтнийи. Дугъан ихтилатнаан учуз мялум гъабхьиганси, 2013-пи йисан ЧвулатI гъулаъ 320 ученикдиз деъру йишвар ади цIийи мектеб ачмиш гъапIну. Гьаму деврин типовой мектебариъси, ЧвулатI гъулан кьялан мектебдиъра ужуб спортзал, медицинайин нумуналу кабинет, баяр-шубариз ипIруб гьивру ва гьязур апIру йишвар а, яна, мектеб вари лазим вуйибдихъди тямин дапIна.
«Гьамусяаьт ич мектебдиъ 160 ученикди саб сменайиъ аьгъювалар гъадагъура. Улихьна йисари сабпи класдиз гъафи бицIидарикан кьюб класс дюзмиш шулайи. Цци, гьяйифки, бицIидар саб классдизтIан (10 кас) адар. Гъулаъ инсанариз гъузуз ккунди имдар. Мисал вуди гъадабгъиш, Норильск шагьриъ ич гъул’ан 30 хизан яшамиш шула. Урусатдин имбу шагьраризра гизафдар удучIвну гъягъюра. Гъулаз кьяляхъ хъадакну гъюрайидарра а. Магьа цци 7 ученик гъулан мектебдиан удучIвну гъушнийиз, хъа 6 ученик мектебдиз гъадагъунза. Асас вуди дурар гъулаз кьяляхъ хъадакну гъафи касарин баяр-шубар ву»,
– ктибтнийи сюгьбатнаъ Гюляли Ибрагьимовичди.
Мектебдин коллективдин ляхниз, сабвализ директори ужуб кьимат тувнийи.
«Йиз коллектив ужуб коллектив вуйиз. Гьамусяаьт мектебдиъ заан категория айи 17 мялимди зегьмет зигура. Гьадрарикан 12-ри цци категория цIийи алапIну. Мидланра гъайри, мектебдиъ 2 РД-йин образованиейин лайикьлу мялимар – бицIидар тербияламиш апIру пайнан директорин заместитель Аьлимат Мягьмудова ва математикайиан дарс кивру мялим Мягьямед Гьюсейнов а. Гьацира 4 мялим РФ-дин уьмуми образованиейин гьюрматлу гъуллугъчйир ву. Гьадрарин арайиъ Гьясанов Тельман Сиражудинович (математикайин мялим), Мягьмудов Мягьмуд Дадашевич (физикайин мялим), Гюлева Дилара Жяфаровна (бицIи классариз дарсар кивру мялим) ва узу ача»,
– гъапнийи директори.
Къайд дапIну ккундуки, учв Гюляли Ибрагьимович 2018-пи йисан «РД-йин образованиейин отличник», мухрик кибтIру значокдиинди лишанлу дапIна. Мура мектебдин аьхю хъуркьувал ву.
ЕГЭ-йин гьякьнаан ич суалариз жаваб туври, дугъу гьамцдар мялуматар тувнийи. 2018-2019-пи йисан ЧвултIарин мектебдин вари юкьби выпускникарин ЕГЭ-йин натижйир ужудар гъахьну: урус чIалнаан имтигьян 3 выпускникди хьубариз, хъа 1-ри – юкьубдиз тувну, математика 1-ри хьубдиз, 2-ри – юкьубдиз ва 1-ри – шубубдиз тувну.
«Гьамусяаьт 11-пи классдиъ айидарра ужуди урхурайидар вуйич. Магьа улихьнаси СиртIчарин кьялан мектебдиъ ЕГЭ-йиан проб апIбан имтигьян гъабхьну. Айи вари 9 выпускникдикан математикайиан вуйи имтигьян 3 касди хьубдиз, 3-ри – юкьубдиз ва 3 ученикдисан – шубубдиз тувну», – мялум гъапIну директори.
Директори туву мялуматариинди, ЧвултIарин кьялан мектебдин коллективди образованиейин цирклиъ уьмриз кечирмиш апIурайи жюрбежюр программйириъ иштирак хьуз ният дапIна. Мектебдиз «Точка роста» программайиъра иштирак хьуз ккунди айи, амма цIийи классар гьязур апIуз 52 квадратдин метрин йишв айи ичIи ужагъ адрувализ лигну (думу программайин шартIарикан саб вуйи) му ният кIулиз адабгъуз гъабхьундайи.
«Улихьнаси мектебдиз райондин глава Мягьямед Сиражудинович гъафнийи. Думу гъюруган, мектебдиъ рас апIбан ляхнарра кIули гъягъюрайич. Гьадмуган дугъу «Точка роста» программайиъ гьаз иштирак гъахьундарчва кIури, гьерхнийи. Узу 52 квадратдин метрин йишв айи класс адариз гъапиган, дугъу, бицIи уьлчмейин йишв ашра, иштирак’вал апIуз ихтияр а, гъапнийи. Дици вуйихъан мина учу хъайисан му программайиъ иштирак хьуз аьрза тувдича», – къайд гъапIну сюгьбатчийи.
Табасаран райондиз цIийи глава гъафихъан мина, образованиейин таза программа тартиб дапIну, район 7 зонайиз пай дапIна ва гьарсаб зонайиъ зяиф аьгъваювалар айи бицIидарихъди артухъси зегьмет зигбан бадали, гьадму зонайик кабхърайи саб мектеб бинади гъадабгъну, душваз имбуну гъуларианра бицIидар гъюри, дурарихъди дарсариин артухъси зегьмет зигбан къарар адабгъна.
«Ич зонайин биналу йишвси ЧвултIарин мектеб гьисабназ гъадабгъна. Гьамусяаьт мина, математикайин ва урус чIалнан дарсариан лап зяиф аьгъювалар айи, Гюгьрягъян, СиртIчан ва ич гъул’ан 16 ученик гъюра. Дурар учу ЕГЭ тувбахьна гьязур апIидича. Къайд апIуз ккундузузки, гьаму бицIидарихъди ляхин гъабхурайи мялимари чпин ляхин чIанади апIура.
Директори къайд гъапIганси, мектебдин варитIан читин месэла хусуси автобус адрувал ву. «Мектебдин ученикар муниципалин гьарсаб конкурсдиъ, олимпиадйириъ иштирак шула. Дурар учхьан ярхлади айи райондин центриз гъахуз цIиб гъагъиди алабхъурачуз. Хъа дарш жара читинвалар гьелелиг адарчуз», – аьлава гъапIнийи Гюляли Ибрагьимовичди.
