Ноябрин 10-пи йигъан вари уьлкейиъ къайд апIурайи айтIан ляхнарин органарин гъуллугъчйирин Йигъагъди аьлакьалуди «Табасарандин нурар» газатдин редакцияйиз му цирклиъ лихурайи табасаран дишагьли Жульета Зугьрабовайиз дих гъапIнийча. РД-йин МВД-йин Советский РОВД-йиъ полицияйин майорди лихури, дугъан хайлин йисар ву.
Жульета Зугьрабовайин абйир-бабар Ислам ва Марият Хив райондин Гъвандикк гъул’ан Мягьячгъала шагьриз кючмиш гъахьидар ву. Дугъаз кьюр чина сар гъардаш а. Мектеб ккудубкIбан кьяляхъ, Жульета Мягьячгъала шагьриъ ДГУ-йин юридический факультетдик урхуз кучIвнийи. МВД-йин гъуллугънаъ лихувал дугъаз гьеле учв бицIи риш вуйи вахтнахъан мина кьабулди айи. Мектебдиъ урхурайиган, дуст шубариз чан уьмриз кадабгънайи пишейикан ктибтури, дугъу гьаз чаз думу пише кьабулди вуш, мисалар хури гъахьну. Дугъан адашра цIа кабхъбахьан уьрхру частнаъ лихури гъахьну. Дугъаз, икибаштIан, полицияйин цирк-лиъ лихуз дишагьлийиз гъагъиди алабхъруваликан хабар айи, гьаддиз шураз медицинайин пише тувру идарйириз документар тувуз теклиф гъапIнийи. Амма Жульетайи чахьан фунуб ляхинра удукьруваликан кьатI’иди пуз хъюгъиган, адашди, чан шуран саб гафниинра шаклу дархьиди, дугъаз ягъурлу рякъ ккун гъапIнийи.
Зегьметнан рякъ Жульетайи РД-йин МВД-йин мялуматар тувру центриъ ккебгънийи. Гьамусяаьт думу Советский РОВД-йин полицияйин майор ву. Полицияйиъ гъуллугънаъ лихуз дишагьлийиз гъагъиди вуйин кIури, учу суал тувган, Жульета кIвантIарикк сацIиб инчI ккади учухьинди гъилигнийи.
«Фу пуза? Эгер ухьу азад вахт цIибтIан адруваликан улхуруш, ав, гъагъиди ву. Учу кми-кмиди, гьам йигъандинси, йишвандин фунуб-вушра вахтнара тревогайин гьарайнахъди уч апIуру. Веледариз, жвуваз ккунибкьан вахт жара апIуз мумкинвал шулдар. Узу лихурайи гъуллугъ дишагьлийиртIан жилар артухъ айиб, хябяхъган кьаназ лихури гъузруб ву. Учу машкврар, хизандин серенжемар дарпиди, лихурача. Гьаму терефариан сацIиб гъагъиди ву. Амма узу му пише ктабгъбиин саб дакьикьайиъра швумал гъахьундарза», − ктибтура Жульета Исламовнайи.
Жульетайиз кьюр велед а. Дугъан бали Мягьямадди Рязань шагьриъ военный десантдин училищейиъ, хъа шуру Лейлайи Мягьячгъалайиъ юридический колледждиъ урхура.
Аргъаж шулайи насил тербияламиш апIбакан вуйи ич сюгьбатнаъ Жульетайи гъапиганси, веледарин хасият асас вуди хизандиъ айи аьгьвалатнакан, абйир-бабарихъди вуйи аьлакьйирикан, гъадагъурайи насигьятарикан асиллу шула.
«Узу абйир-бабарик тахсир кипрадарза, дураринра гъавриъ ахъну ккунду. ГвачIнин ухди ляхниз гъягъюз хул’ан удучIвдар, дурар хябяхъган лап кьанди кьяляхъ гъюра. Гъафиганра хулан ляхнариин, хураг гьязур апIбиин машгъул шулу. Гьаму вахтна саб фтикан-вуш ктибтури гъвалахъна гъафи веледдихъ хъпехъуз гьеле-меле бабариз ккундар. Мидланра гъайри, телефонариъ, компьютерарин сетариъ баяр-шубари уйнамиш апIурайи тамшири дурариз чIуру тясир апIура. Гьарсаб РОВД-йиъ яшар бегьем духьну адрударин ляхнариз лигру отдел а. Узуз ич отделиз хурайи баяр-шубар рякъюразуз. Дурарин асас пай абйир-бабарин тербияйиккан ккадахьдар ву. Гьамусяаьт «набалугъ’валиан жигьилвализ удучIвру яш» кIуру гафар модайиъ ахьна. Хъа ухьура гьадму вахтнаан удучIвундарин? БицIидари, чпин фукьан йисар вушра, жвуван тахсир гьисс апIуру. Веледариз тербияйин, насиягьтнан, ватанпервервалин тербия тувну ккунду. Улихьган абйир-бабариз, мялимариз, майил-мадатдиз хатур-гьюрмат апIувал гизаф айи. Жвув абйир-бабари фици вердиш гъапIнуш, думу чан веледаризра гьациб тербия тувуз чалишмиш духьну ккунду», – къайд гъапIну Жульета Исламовнайи.
Жульета Зугьрабова кIулиъ ади МВД-йин вари гъуллугъчйириз чпин пишекарвалин ляхниъ хъуркьувалар ккун апIурача. Гъит, дурариз ихь хатIасузвал уьбхбаан чпи гъабхурайи ляхниъ дявдин, гучI’вал кайи вая жара гъагъи дюшюшарин гьякьнаан хабар тувбан сигнал саб вахтнара деребхьри.
