Гьаму йигъари Хив райондиъ яшлуйирин ва инвалидарин арайиъ улариз кьитди рябкърударин Йигъ къайд гъапIну.
Мицисдар серенжемар райондиъ къайд апIувал аьдат дубхьна. Серенжемдиъ райондин депутатари ва гьаму йигъари тазади кадагънайи Хив райондин депутатарин Собраниейин председатель Садикь Исрафиловди иштирак’вал гъапIнийи.

 

Уч духьнайдарин ва депутатарин улихь социалин ляхнин центрин пишекар Исабала Гьясратов удучIвну гъулхнийи. Дугъу чан улхбаъ серенжемдиз уч духьнайи, жандин зяифвал айи касариз мюгькам сагъ’вал ва хизандиъ гьарган манишин гъубзувал ккун гъапIнийи. Дурарикан, жан сагъ’вал жигьатнаан зяиф ву пну, гьич саб вахтнара кIул мухриъ ипру агьлар дархьувал тIалаб гъапIнийи. Хъа душваъ иштирак шулайи депутатарикан ва иццурайидарин майил-мадатарикан гьарган дурарин гъайгъушнаъ хьувал ккун гъапIнийи.

 

«КIури шулуки, кьабир хулаъ хьувал хизандин берекет ва мешреб ву, амма, гьяйифки, ухьу дидин кьандитIан гъавриъ шулдархьа. Гъит, ичв хулариан, ужагъариан мициб мешреб ва берекет гьич саб вахтнара кам дарибшри. Кьабирин ва бицIирин хасият саб ву. Гьаддиз, артухъ бизар дархьиди, дурарин гъайгъушнаъ йихьай. Дурари гъядапIишра, учву гъапIу ужуб ляхин Аллагьди гъядапIидар. Ихьдари кIуруганси, изан апIруган, му кIулизра, тму кIулизра гъягъюру. Гьаци гъабхьиган, му закурин йигъан ухьухъра хъайи йигъ-йишв ву пну, фикир апIинай. Эгер дурарин гъайгъушнаъ учву дархьиш, ичв гъайгъушнаъ учву гъапIу веледарра даршул», – къайд гъапIнийи дугъу.

 

Садикь Исрафиловди ва Исабала Гьясратовди чпин улхбариъ, мицисдар мажлисар тебрик ва къаршуламиш апIруган гъирагъдилан кюмек дархьиш, кIул`инди чпихьан дурар кIулиз адагъуз даршлуваликан гъапнийи ва чпиз кюмек апIурайи депутатариз, ариш-веришчйириз аферин мялум гъапIнийи. Мицисдар мажлисариз гьарган хил гьачIабккурайи халкьдин депутатар Нариман Асваровдиз ва Марат Аслановдиз дурари аьхю чухсагъул гъапнийи.
Серенжемдин аьхириъ, сагъламвалин жигьатнаан зяиф касариз итIру сурсатар айи пакетар тувнийи.